Elimizde 14 myń adam depýtat bolǵysy keledi

ASTANA. QazAqparat – 19 naýryzda ótetin kezekten tys Májilis pen barlyq deńgeıdegi máslıhattar depýtattyǵyna 14 myńnan astam kandıdat usynyldy, dep habarlaıdy QazAqparat tilshisi.

«Májilis depýtattyǵyna 7 partııadan partııalyq tizimmen 283 kandıdat usynylyp otyr. Májiliske majorıtarlyq okrýg boıynsha jalpy sany - 609 kandıdat. Barlyq deńgeıdegi máslıhattar boıynsha 119 partııalyq tizim boldy. Atalǵan tizimde 1 471 kandıdat bar. Majorıtarlyq okrýgter boıynsha máslıhattarǵa - 11 844 kandıdat. Jalpy esepti qaraıtyn bolsaq, Májilis pen máslıhattar boıynsha 14 207 kandıdat usynyldy», - dedi Ortalyq saılaý komıssııasynyń tóraǵasy Nurlan Ábdirov búgin komıssııa otyrysynda.

Aıta keteıik, Májilis saılaýyna 7 saıası partııa qatysady.

Onyń ishinde partııalyq tizim arqyly Qazaqstan halyq partııasynan - 52, Aq jol partııasynan - 54, Jalpyulttyq sotsıal-demokratııalyq partııasynan – 19, «Baıtaq» jasyldar partııasynan» - 18, «Aýyl» partııasynan – 25, Respublica partııasynan – 25, AMANAT partııasynan – 90 kandıdat. Kandıdattardyń jalpy sany – 283. Ortalyq saılaý komıssııasyna kandıdattardyń atynan tapsyrylǵan qujattar «Saılaý týraly» Konstıtýtsııalyq zańǵa saı keledi.