Elimizde 125 mln tonna turmystyq qaldyq jınaqtalyp tur - mınıstr

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev jańa ekologııalyq kodekske sáıkes, óndiris jáne tutyný qaldyqtary qalaı óńdeletinin aıtyp berdi, dep habarlaıdy QazAqparat tilshisi.

«Bul baǵytta áli kóp jumys bar ekenin moıyndaý kerek. Damyǵan elder osy salada ınnovatsııalyq sheshimderge áldeqashan kóshken. Biz ázirge buǵan tek umtylýdamyz. Búgingi kúni elimizdiń 3,2 myń polıgonynda 125 mln tonna qatty turmystyq qaldyq jınaqtalǵan. 2019 jyly qaldyqtardy qaıta óńdeý úlesi 15 paıyzdy qurady. Alaıda bul múlde az. Salystyrar bolsaq, damyǵan elderde bul kórsetkish 30%-dan asady», - dedi Maǵzum Myrzaǵalıev OKQ-da ótken baspasóz máslıhatynda.

Osyǵan baılanysty zańnamalyq negizde qaldyqtardyń jınalýyn azaıtý úshin WASTE TO ENERGY tehnologııasyn qoldana otyryp, qaldyqtardy energetıkalyq kádege jaratý tártibi engizigen. Bul tehnologııaǵa sáıkes qoqys órtelip, elektr qýaty shyǵarylady, sodan keıin ol jalpy elektr jelisine satylady.

«Búgin de 6 pılottyq qala anyqtaldy. Bul Aqtóbe, Almaty, Atyraý, Nur-Sultan, Taraz jáne Shymkent qalalary. Ákimdiktermen jer ýchaskeleri, ınfraqurylym jáne qaldyqtarmen kepildendirilgen júkteme máseleleri boıynsha suraqtar belsendi pysyqtalýda. Pılottyq jobalar tabysty iske asyrylǵan jaǵdaıda, tájirıbe basqa qalalarǵa da taratylady. Osy tehnologııanyń arqasynda biz 2025 jylǵa qaraı qaıta óńdeý deńgeıin 30%-ǵa, ıaǵnı orta eýropalyq deńgeıge deıin jetkizemiz dep josparlaýdamyz», - dedi ol.