Elimizde 116 jańartylatyn energetıka nysany jumys istep tur

NUR-SULTAN. QazAqparat – Búgin Úkimet otyrysynda QR Energetıka mınıstri Nurlan Noǵaev jańartylatyn energııa qýatyn arttyrýǵa belsendi qatysyp jatqan el óńirlerin atady, dep habarlaıdy QazAqparat tilshisi.

Qazirgi ýaqytta respýblıkada belgilengen qýaty 1685 MVt bolatyn 116 jańartylatyn energetıka nysany jumys isteıdi. Sonyń ishinde: - 29 jel elektr stantsııasy, qýaty – 486 MVt;

- 44 kún elektr stantsııasy , qýaty - 962 MVt;

– 38 gıdro elektr stantsııasy , qýaty - 230 MVt;

- 5 bıo elektr stantsııasy , qýaty - 8 MVt.

«2020 jyldyń qorytyndysy boıynsha óndirilgen jasyl energııa kólemi 3,24 mlrd kVtsaǵ qurady. Óńirlerde jańartylatyn energııa kózderi nysandaryn ornalastyrý resýrstyq áleýetti, elektr energııasyna degen qajettilikti, Birtutas elektr energetıkalyq júıesiniń aımaqtary boıynsha barynsha jol beriletin qýattardy jáne ınfraqurylymnyń ázirligin eskere otyryp júrgiziledi. Bul Qazaqstannyń birtutas elektr energetıkalyq júıesiniń senimdi jumysy úshin jańartylatyn energııa qýatynyń lımıtterin saqtaýǵa múmkindik beredi. Osyǵan oraı, eń kóp joba Almaty oblysynda (32 nysan – 332 MVt), Jambyl oblysynda (15 nysan - 318 MVt) jáne Qaraǵandy oblysynda (9 nysan -233 MVt) júzege asyp jatyr», - dedi mınıstr.

Onyń aıtýnysha, óńirlerde Aqtóbe, Aqmola jáne Túrkistan oblystarynyń ákimdikteri ınvestorlarǵa úlken qoldaý kórsetip keledi.

Budan buryn habarlanǵandaı, Úkimet otyrysynda Úkimet basshysy Asqar Mamın JEK-tiń óńirlik aımaqtaryn qurý máselesin pysyqtaý tapsyrdy.