Elimizde 11 mln 730 myń azamat turǵylyqty jerinde tirkelgen
«Naqty saılaý ýchaskesine azamatty saılaýshylar tizilimine engizý úshin onyń osy saılaý ýchaskesiniń aýmaǵyndaǵy turǵylyqty jeri boıynsha tirkelý faktisi negiz bolyp sanalady. «Halyqtyń kóshi-qony týraly» zańnyń 51-babynda ishki kóship-qonýshylardyń turaqty jáne ýaqytsha turǵylyqty jeri boıynsha tirkelý mindeti kózdelgen. Osy mindetti saqtamaǵany úshin ákimshilik kodekstiń 492-babynda ákimshilik jaýapkershilik qarastyrylǵan. Іshki kóship-qonýshylardy tirkeý tártibi QR Úkimetiniń 2011 jylǵy №1427 qaýlysymen rettelgen. Qaǵıdalarǵa sáıkes, QR azamattary jańa turǵylyqty jerine nemese ýaqytsha turýǵa kelgen kúninen bastap kúntizbelik 10 kúnde tirkeledi. Búginde halyqty turǵylyqty jeri boıynsha tirkeý rásimi tolyǵymen avtomattandyrylǵan jáne elektrondyq-tsıfrlyq qoltańbasy bolǵan kezde elektrondy úkimet portaly nemese mobıldi úkimet qosymshasy arqyly, sonymen qatar Halyqqa qyzmet kórsetý ortalyqtaryna júgingen kezde rásimdeledi. Tirkeý 3-5 mınýttan aspaıtyn ýaqytty alady», - dedi ol Ortalyq saılaý komıssııasynyń otyrysynda.
Onyń atap ótýinshe, turǵylyqty ne ýaqytsha turatyn jeri boıynsha tirkeý kezinde jańa meken jaı týraly málimetter dereý ІІM-niń aqparattyq júıesine engiziledi. Ol jerde onlaın rejımde Ádilet mınıstrliginiń «Jeke tulǵalar» memlekettik derekqoryna engiziledi. Sonyń negizinde jergilikti atqarýshy organdar men OSK saılaýshylardyń tizilimin jasaıdy.
«ІІM málimetteri boıynsha osy jyldyń 26 qazanyndaǵy jaǵdaıǵa sáıkes, elimizde 18 jasqa tolǵan 11 733 944 azamat tirkelgen. Onyń ishinde 11 099 923 turǵylyqty jeri boıynsha turaqty tirkelgen. 15 324 adam tek ýaqytsha tirkeýge alynǵan. 618 myńnan astam adam turǵylyqty jeri boıynsha tirkeýden shyǵarylǵan. Qazir mınıstrlik Ortalyq saılaý komıssııasymen birlesip, saılaýshylar tizimin ózektendirý boıynsha ózara is-qımyl algarıtmderin pysyqtaýda. Soǵan sáıkes, Parlament Májilisi depýtattaryn saılaýǵa daıyndyq boıynsha jumys jalǵasady», - dedi Marat Qojaev.