Elimizde 100-ge jýyq densaýlyq nysanynyń qurylysy bastaldy

ASTANA. QazAqparat – Respýblıkalyq bıýdjetten elimiz boıynsha 99 densaýlyq saqtaý nysanyn salýǵa qarajat bólindi. Bul jaıynda Densaýlyq saqtaý mınıstrligi QazAqparat saýalyna oraı málim etti.

Vedomstvo aqparatynsha, 2023-2024 jyldary aralyǵynda Ulttyq joba aıasynda aýyldyq jerlerde 655 medıtsınalyq-sanıtarııalyq alǵashqy kómek nysany salynady.

«Búginde 99 nysandy salýǵa respýblıkalyq bıýdjetten qarajat bólindi. Onyń ishinde 91 nysannyń (Aqtóbe oblysynda – 8, Atyraý oblysynda – 3, ShQO-da – 17, BQO-da – 12, Jambyl oblysynda – 4, Qaraǵandy oblysynda 14, Qostanaı oblysynda – 6, Qyzylorda oblysynda – 15, SQO-da – 7, Ulytaý oblysynda - 5) qurylysy bastaldy. Qalǵan nysandar boıynsha merdigerdi anyqtaýǵa qatysty konkýrstyq rásimder júrgizilip jatyr», - dep atap ótedi mınıstrlikten.