Elimizde 1 myńnan astam aýylda ınternet joq

NUR-SULTAN. QazAqparat - Elimizde uıaly baılanys operatorlarynyń jumysy synǵa alyndy, dep habarlaıdy QazAqparat tilshisi.

«Memlekettik organdardyń málimetine sáıkes, búginde elimizde 1 178 aýyl ınternetpen qamtylmaǵan. Jáne 510 aýylda ınternettiń sapasy nashar. Buǵan qatysty Memleket basshysy da eskertý jasap, quzyrly organdarǵa tapsyrma berdi. Qazir ýaqytta otandyq naryqta Beeline, Tele2, Altel, Kcell sekildi birneshe uıaly baılanys operatory bar. Ashyq derekterge sáıkes, atalǵan uıaly baılanys operatorlarynyń kirisi 2018 jyly 240 mlrd teńge, 2019 jyly 360 mlrd teńge jáne 2020 jyly 472 mlrd teńgeni qurap otyr. Odan bólek, uıaly baılanys kompanııalarynyń jelini jańǵyrtý jumysyna tartylǵan ınvestıtsııany esepteńiz. Investıtsııanyń jyldyq kólemi Beeline kompanııasynda 27 %, al qalǵandarynda 5,7 % -dy quraıdy», - dedi QR Baılanys jáne tsıfrlandyrý ulttyq qaýymdastyǵynyń vıtse-prezıdenti Janat Asantaev elordada ótken otandyq telekommýnıkatsııa jáne tsıfrlandyrý salasynyń damý barysyna arnalǵan dóńgelek ústel barysynda.

Onyń aıtýynsha, ásirese aýyldyq jerlerdegi ınternet sapasy esh syn kótermeıdi.

«Uıaly baılanys operatorlarynyń kirisi joǵary, biraq sapaly ınternetpen qamtı almaı otyr. Ásirese aýylda. Osy oraıda zańnama jaǵyn qaıta qaraý kerek», - deıdi ol.

Sondaı-aq, spıker Tsıfrlyq damý, ınnovatsııalar jáne aeroǵarysh ónerkásibi mınıstrligine atalǵan sala qyzmetine qatysty revızııa ótkizýdi usyndy.