Elimizde 1 aptada 3 600-den astam qylmys tirkeldi

ASTANA. QazAqparat – Elimizdiń aýmaǵynda bir apta ishinde 3 600-den astam qylmys tirkeldi. Bul týraly Іshki ister mınıstrliginiń resmı ókili Shuǵyla Turlybek aıtty, dep habarlaıdy QazAqparat tilshisi.

«Bir apta ishinde 3 608 qylmys jasaldy, onyń 1893-i táýlik ishinde ashyldy. Polıtsııa qyzmetkerleri «izin sýytpaı» 2 kisi óltirýdi, 1 ólimge ákep soqqan densaýlyqqa qasaqana aýyr zııan keltirýdi, 2 qaraqshylyq, 35 tonaý jáne 377 bóten múlikti urlaý qylmystaryn ashty», - dedi ol mınıstrliktiń baspasóz qyzmeti alańynda ótken brıfıngte.

Sonymen qatar resmı ókil ótken aptada quqyq qorǵaý jáne arnaıy organdardyń komandalary Іshki ister mınıstri kýbogyn sarapqa salǵanyn atap ótti. 17 komanda qatysqan shaǵyn fýtbol saıysynda ІІM qurama komandasy 1-oryndy, «Dınamo» komandasy 2-oryndy, QR ІІM Ulttyq ulanynyń komandasy 3-oryndy ıelengen.