Elimizde 1,8 mln adam tumaýǵa qarsy vaktsına aldy

ASTANA. QazAqparat – Respýblıka halqynyń 9,5 paıyzy tumaýǵa qarsy vaktsına aldy. Bul týraly Densaýlyq saqtaý mınıstrligi sanıtarııalyq-epıdemıologııalyq baqylaý komıteti juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova málim etti, dep habarlaıdy QazAqparat tilshisi.

«Qazan aıynan bastap tumaýǵa qarsy jappaı vaktsına egý júrip jatyr. Elimiz boıynsha tumaýǵa qarsy 1 806 710 adam vaktsına aldy. Bul – respýblıka halqynyń 9,5%. Atap aıtsaq, tumaýǵa qarsy vaktsınany jergilikti bıýdjet qarajatynan 1 758 875 adam (97,3%), jumys berýshiler esebinen 28 295 adam (1,6%) jáne aqyly negizde 19 540 adam (1,1%) saldyrdy. Vaktsına alǵandar arasynda 14 jasqa deıingi balalardyń sany – 392 076 (21,2%), al eresek adamdar – 1 423 287 (78,8%)», - dedi Roza Qojapova Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, tumaýǵa qarsy vaktsınatsııadan keıin asqyný jaǵdaıy tirkelgen joq.

Sondaı-aq, maman aýrýdyń aldyn alý úshin kelesi profılaktıka sharalaryn saqtaýdy usyndy:

- adamdar kóp jınalatyn oryndarǵa, ásirese jabyq bólmelerge barýdy shekteý;

- bólmelerdi jeldetý, antıseptıkalyq quraldardy paıdalanyp, dezınfektsııalyq rejımdi kúsheıtý;

- qoldy óńdeý úshin antıseptıkterdi nemese dezınfektsııalyq sýlyqtardy paıdalaný;

- naýqas adamdarmen baılanysty shekteý, olardy oqshaýlaý;

- aýyrǵandardyń 80%-y balalar ekenin eskere otyryp, tumaý men JRVI belgileri paıda bolǵan kezde balalardy úıde qaldyryp, uıymdasqan ujymdarǵa (mektepke deıingi uıymdarǵa, mektepterge) jibermeý kerek;

- medıtsınalyq kómekke ýaqtyly júginý kerek.