Elimiz jańa saıası júıege kóship jatyr – máslıhat depýtaty Vladımır Vıtchenko

PETROPAVL. QazAqparat – Petropavl qalalyq máslıhatynyń depýtaty, «Búkilqazaqstandyq Kıokýshınkaı Karate uıymy» RQB Soltústik Qazaqstan oblystyq fılıalynyń dırektory, karateden jattyqtyrýshy Vladımır Vıtchenko aldaǵy Prezıdent saılaýyna zor úmit artyp otyr. Depýtat elde kóptegen oń ózgeris bolyp jatyr, nátıjesin aldaǵy eki-úsh jylda kóre bastaımyz degen pikirde, dep habarlaıdy QazAqparat tilshisi.

Memleket basshysy Qasym-Jomart Toqaev Prezıdent saılaýyn 20 qarashaǵa bekitti. Petropavl qalalyq máslıhatynyń depýtaty Vladımır Vıtchenkonyń aıtýynsha, Prezıdentti 7 jylǵa ǵana saılaý jónindegi sheshimniń kóptegen oń tusy bar, máselen, Prezıdenttikten úmitker óziniń bir merzimge ǵana saılanatynyn biledi, osy aralyqta ol óz jumysyn kórsetip, elimizdegi jaǵdaıdy jaqsy jaqqa ózgertýi tıis.

«Jeti jyl jetkilikti, osy aralyqta ol saılaýaldy baǵdarlamasyn jetildirip, taǵy bir-eki jylyn ony iske asyrýǵa jumsasa, qalǵan jyldary onyń nátıjesin kóre alady. Prezıdent bir ǵana merzimge saılanatyndyqtan osy aralyqta el ıgiligine bar kúshin jumsaýǵa tyrysady. Sáıkesinshe, 20 qarashada bolatyn Prezıdent saılaýyna túsetin ár úmitkerge zor jaýapkershilik artylyp otyr. Al prezıdenttiń ókildigi bitisimen ol QR Konstıtýtsııasyna sáıkes, elge paıdasyn basqa laýazymda, máselen Prezıdenttiń keńesshisi bolyp tıgize alady.

Prezıdenttiń halyqqa sońǵy úndeýi bıyl bolǵan konstıtýtsııalyq reformanyń tıisti deńgeıde júzege asyrylýyna qatysty. Konstıtýtsııaǵa ózgerister engizýge qatysty respýblıkalyq referendým ótti. Nátıjesinde Konstıtýtsııamyzdyń 33 babyna túzetýler engizildi. Osylaısha halyqqa meılinshe erkindik berilip, demokratııa men zań ústemdigi kúsheıtildi. Elimiz jańa saıası júıege kóship jatyr», - deıdi Vladımır Vıtchenko.

Depýtattyń aıtýynsha, Prezıdent saılaýy ótisimen Parlament Májilisi, túrli deńgeıdegi máslıhat depýtattarynyń saılaýy ótedi.

«Oǵan tek partııa músheleri ǵana emes, ózin-ózi usynýshylar da qatysa alady. Bul eldi demokratııalandyrýda jaqsy nátıje bereri sózsiz. Halyq óz pikirin ashyq aıtýǵa múmkindik alady, nátıjesinde «estıtin» memleketke aınalamyz», - deıdi Vladımır Vıtchenko.