«Elimiz qýatty bolsa, memlekettik tildiń bolashaǵy da son­shalyq shýaqty bolmaq» - respýblıkalyq basylymdarǵa sholý

ASTANA. 16 jeltoqsan. QazAqparat - - Qazaq aqparat agenttigi respýblıkalyq basylymdarda 16 jeltoqsan, juma kúni shyqqan ózekti materıaldarǵa sholýdy usynady.

***

Keshe Astanadaǵy Táýelsizdik saraıynda Qazaqstan Respýblıkasy Táýelsizdiginiń 20 jyldyǵyna arnalǵan saltanatty jınalys bolyp, onda Elbasy Nursultan Nazarbaev sóz sóıledi. Ult Kóshbasshysy N.Nazarbaevtyń sóılegen sóziniń tolyq mátini «Egemen Qazaqstan» gazetinde berilip otyr. «Táýelsizdik jyldary qazaq halqy - ulystyń uıytqysyna, qa­zaq tili - tutas ulystyń ortaq ti­line aınaldy. Árıne, til máselesi - ýaqyt­tyń enshisinde. Sannyń artýy, sananyń ornyǵýymen barlyǵy óz ornyna keledi. Bul oraıda, bizdiń basty baı­lyǵymyz - el birligi ekenin eshýaqytta umytpaýymyz kerek! Elimiz qýatty bolsa, memlekettik tildiń bolashaǵy da son­shalyq shýaqty bolmaq. Dúnıede qazaq degen el barda qazaq tili máńgi jasaı beredi!!!», - deıdi Memleket basshysy óz sózinde.

«Egemen Qazaqstan» gazetine el Táýelsizdiginiń 20 jyldyǵy qarsańynda baýyrlas Túrik eliniń Prezıdenti Abdýlla Gúlden suhbat alýdyń sáti tústi. Suhbat barysynda Túrik memleketiniń basshysy osy 20 jyldyń ishinde Qazaqstannyń jetken jetistikteri týraly yqylaspen áńgimeleıdi. «Qazaqstan óziniń turaqty túrde alǵa ba­sýy­nyń nátıjesinde óz óńirindegi jetekshi memleketterdiń birine, halyq­ara­lyq qoǵam­das­tyqtyń qurmetti múshesine aınaldy. Osy rette Qazaqstannyń 2010 jyly EQYU-ǵa tóraǵalyq etýin jáne onyń sammıtin tabysty ótkizýin barly­ǵy­myzdyń ortaq maqtanyshymyz dep bilemin. Eldiń halyq­ara­lyq úderisterdiń qurmetti qatysýshy retindegi bedelin munan keıin, ıaǵnı ústimizdegi jyly Islam Yntymaqtastyǵy Uıymyna jetekshilik jasaýy odan ári aıqyndaı tústi», - deıdi Túrkııa Prezıdenti. Suhbat «Túrkııa - Qazaqstan Táýelsizdigin birinshi bolyp tanyǵan el» degen taqyryppen berilgen.

***

«2015 jylǵa qaraı «Atasý - Alashankoý» munaı qubyrynyń ótkizý qýaty 20 mıllıon tonnaǵa jetkiziledi», - dep jazady «Aıqyn» gazeti merekelik sanyndaǵy «Munaı eksporty ósýde» degen taqyryptaǵy maqalasynda. Basylymnyń atap ótýinshe, keshe, jeltoqsannyń 15-i kúni Qazaqstan Respýblıkasy Táýelsizdiginiń 20 jyldyq mereıtoıy qarsańynda taǵy bir mańyzdy joba iske qosyldy. Almaty oblysy, Alakól aýdanyndaǵy Úsharal qalasynyń janynda, «Atasý - Alashankoý» munaı qubyrynyń boıynan №11-nasostyq stansasy qoldanysqa berildi. Elbasy Nursultan Nazarbaevtyń ózi Qazaqstan men Qytaı arasyndaǵy ınvestıtsııalyq yntymaqtastyqtyń eń joǵary, eń jarqyn mysaly dep baǵalaǵan «Atasý - Alashankoý» munaı qubyrynyń tasymaldaý qýaty osy nasostyq stansanyń iske qosylýymen jylyna 12 mıllıon tonnaǵa deıin artpaq.

Senat otyrysynda Premer-mınıstr Kárim Másimovtiń atyna depýtattyq saýal joldaǵan depýtat Murat Muhamedov Jeltoqsan kóterilisshileriniń mártebesin anyqtaıtyn zań qabyldaýdyń ýaqyty pisip-jetken degen paıymyn alǵa tartqan. Bul jaıynda «Aıqyn» gazetiniń búgingi sanyndaǵy «Jeltoqsandyqtardyń mártebesi zańmen belgilense...» degen taqyryptaǵy maqalada baıandalǵan. «Sony jasaý úshin Úkimet tarapynan arnaıy komıssııa kurylyp, ol komıssııanyń quramyna barlyq múddeli toptardyń, atap aıtqanda, Parlament depýtattary, Іshki ister mınıstrligi, Ulttyq qaýipsizdik komıteti, Bas prokýratýra, Eńbek jáne halyqty álýmettik qorǵaý mınıstrligi, Ádilet mınıstrligi, qoǵamdyq jáne úkimettik emes uıymdarynyń ókilderi engizilip, Jeltoqsan kóterilisine qatysqan azamattardyń saıası-quqyqtyq mártebesine baılanysty zańdy ázirleý úshin jan-jaqty zertteýler men taldaýlar jasalýy qajet dep sanaımyn», - deıdi senator M.Muhamedov.

***

«Kazahstanskaıa pravda» gazetiniń jazýynsha, Memleket basshysy Nursultan Nazarbaev Qazaqstan Respýblıkasy Táýelsizdiginiń 20 jyldyǵyna arnalyp, «Qazaqstan» ortalyq kontsert zalynda ótken merekelik kontsertti tamashalady. Kontsertte KSRO halyq artısi Álibek Dinishev, Qazaqstannyń halyq artısi, Memlekettik syılyqtyń laýreaty Nurjamal Úsenbaeva, Qazaqstannyń halyq artısi, Memlekettik syılyqtyń laýreaty Jánııa Áýbákirova, Qazaqstannyń halyq artısi, Memlekettik syılyqtyń laýreaty Aıman Musaqojaeva, Qazaqstannyń halyq artısi Roza Rymbaeva, sondaı-aq respýblıkalyq jáne halyqaralyq baıqaýlardyń laýreattary, halyq aspaptar orkestri, bı ansamblderi óner kórsetti.