Elimiz elektrondyq úkimetti damytýdyń jahandyq reıtınginde 29-orynǵa ıe – Baǵdat Mýsın
Vedomstvo basshysy aldymen Faceebok áleýmettik jelisindegi paraqshasynda baılanys jáne aqparattandyrý salasy qyzmetkerlerin kásibı merekelerimen quttyqtaǵan.
«Memleket basshysy Qasym-Jomart Toqaev progressıvti kóshbasshy retinde tsıfrlandyrýdy ulttyq básekege qabilettilikke qol jetkizýdiń negizgi quraly retinde kóredi. Bul týraly ol ótken Joldaýynda málimdegen bolatyn. Biz memleketti tsıfrlandyrý jónindegi jumysty jalǵastyrýdamyz jáne bul aýqymdy protsess IT jáne telekommýnıkatsııa salasyndaǵy kásibı mamandarsyz júzege aspaıtyny anyq.
Tsıfrlandyrý, eń aldymen, halyqtyń ómirin jeńildetýge baǵyttalǵan: qazaqstandyqtardy qoljetimdi ınternetpen jáne uıaly baılanyspen qamtamasyz etý boıynsha úlken jumys júrgizilýde», - dep jazdy mınıstr.
Ol elimiz elektrondyq úkimetti damytýdyń jahandyq reıtınginde BUU-ǵa múshe 193 eldiń ishinde 29-orynǵa ıe ekenin de atap ótken. Úkimettiń ashyq derekter ındeksi boıynsha Qazaqstan Azııa elderi arasynda 1-oryndy ıelendi.
«Jasyrmaımyn, bul salanyń óz problemalary bar. Mysaly, shalǵaı eldi mekenderdiń turǵyndary uıaly baılanys, ınternet sapasyna jáne t.b. shaǵymdanady, biz bul máselelerdi jedel sheshýge tyrysamyz.
IT salasy qyzmetkerleriniń bolashaǵy zor. Fortune-500 tizimindegi kompanııalar erteńin oılap, ýaqytyly tsıfrlyq damý jolyn tańdaǵan kompanııalar! Barshańyzdy shyn júrekten quttyqtaı kele, rızashylyǵymdy jetkizemin, sizder bolashaq ekonomıkanyń negizin quryp jatyrsyzdar!» - deıdi Baǵdat Mýsın.
Ol mereke qarsańynda Qazaqstan resmı túrde Ortalyq Azııadaǵy Google for Startups (GfS) uıymynyń alǵashqy seriktesi bolǵanyn súıinshiledi. Mınıstrdiń paıymynsha, bul oqıǵa - elimizdiń, sondaı-aq búkil IT-qoǵamdastyǵymyzdyń eńbeginiń moıyndalýy.