Elimiz ary qaraı damý úshin saıasat birinshi turýy kerek - Erlan Saırov
Marafon kezinde «aldymen ekonomıka nemese saıasat» degen taqyryp talqylandy.
«Elimiz Táýelsizdik alǵannan beri 30 jyldan asyp barady. Osy ýaqyt ishinde biraz jetistiktermen qatar, kemshilikter de boldy. Mine, osy kemshilikterdiń bolýynyń sebebi – bizdiń qoǵamymyzda eshqandaı baqylaý tetikteri bolmady. Meniń oıymsha, biz ary qaraı damýdy maqsat tutsaq, saıasat birinshi turýy kerek», - dedi E. Saırov.
Osy oraıda depýtat elimiz ekonomıkalyq turǵyda qarqyndy damýy úshin mindetti túrde saıası júıe aıasynda saıası ult deńgeıine shyǵý mańyzdy ekenin atap ótti.
«Saıası ult degenimiz – ol toqtaýsyz ári úzdiksiz saıası protsester», - dedi Erlan Saırov.
Óz kezeginde «Rýhanı jańǵyrý» qazaqstandyq qoǵamdyq damý ınstıtýtynyń basqarma tóraǵasy Qazybek Maıgeldınov te osy taqyrypqa qatysty pikir bildirdi.
«Tarıhqa kóz júgirtsek, Keńes úkimetiniń qulaýynyń basty sebepteriniń biri – josparly ekonomıka. Barlyǵy josparmen júrgizildi. Jospardy asyra silteý men ony jazý boldy. Saldarynan ekonomıkalyq bazıstiń quldyraýyna alyp keldi. Odan keıin táýelsizdik alyp, onda naryqtyq ekonomıkaǵa ekpin qoıyldy. Sol kezde áýeli ekonomıka dep aıtý kerek boldy», - dedi sarapshy.
Onyń aıtýynsha, qazirgi kezde aımaqtarda tepe-teńdik buzylyp ketti. Óńirlerdiń ekonomıkalyq tepe-teńdigi men áleýeti ártúrli bolyp qalyptasty.
«Sonyń saldarynan elimizdegi jergilikti ózin-ózi basqarýdyń tetikteriniń álsizdigin kórsetti. Odan keıin Prezıdent ortalyqsyzdandyrýǵa mán berdi. Bul ne úshin kerek? Árbir aımaq óziniń jergilikti bıznesi men ekonomıkasyn damytýǵa qaýqarly bolýy tıis. Bul turǵyda jergilikti ózin-ózi basqarý uıymdaryna kóbirek ókilettik berý kerek boldy. Qazirgi kezde Prezıdent bastaǵan saıası reformalardyń basty maqsaty osynda. Árbir ákim óziniń aýmaǵyna jaýapty bolýy kerek. Saıası turǵydan alyp qarasaq, azamattardyń saıası belsendigi artyp keledi. Úkimettik emes uıymdar, qarapaıym azamattar tarapynan tıisti suranys bolǵandyqtan, reformalar aıasynda tıisti jaǵdaı jasaýǵa ekpin qoıyldy. Sondyqtan áýeli saıasat, sodan keıin ekonomıka degen betburys negizgi sebepterge baılanysty jasalyp otyr dep oılaımyn», - dedi Qazybek Maıgeldınov.
Sonymen qatar Májilisiniń depýtaty Aıbek Paıaev te saıası júıe alǵashqy orynda turýy kerek ekenin atap ótti.
«Saıası júıe memlekette sapaly, joǵary deńgeıde bolsa, ekonomıkamyz ósedi, halyqtyń jaǵdaıy jaqsarady», - dedi A. Paıaev.