Elimde erkin ómir súrip jatqanym úshin Qazaqstan halqyna alǵys aıtamyn – Ulandyq sarbaz Banadr Isaev
Qazirgi tańda elimizdiń áskerı qurylymdarynda qazaq tilin jaqsy meńgergen ózge ult ókilderi jeterlik. Solardyń biri 5571 áskerı bóliminiń materıaldyq jáne tehnıkalyq qamtamasyz etý rotasynyń sarbazy Banadr Isaev.
Ulttyq ulan sarbazy 2003 jyly 1 maýsymda Shymkent qalasynda ómirge kelgen. Jastaıynan kórshi qazaq balalarymen oınap ósken. Olarmen aralasyp, oınap júrip qazaq tilin erte meńgeredi. Mektep jasyna jetkende, qazaqsha erkin sóıleıtinin baıqaǵan ata-anasy ony qazaq mektebine bergen. 2017 jyly otbasymen birge Astana qalasyna qonys aýdarady. Onda da qazaq mektebine baryp, bilim ordasyn sonda támamdaıdy.
2022 jyldyń mamyr aıynda Banadr áskerı boryshyn óteý úshin Ulttyq ulan qataryna shaqyrylady. Qazirgi kezde áskerı qyzmetti jete meńgergen sarbaz, bólimdegi úlgili áskerı qyzmetshi, senimdi dos, mindetine adal jaýynger.
- Ózim kópultty otbasynda týyp, óstim. Naqty aıtqanda, otbasymyz ýkraın, ázerbaıjan, túrik ultynyń ókilderinen quralǵan. Otbasymyzda barlyǵymyz derlik qazaqsha sóılesemiz. Kórshilerimizdiń bári qazaq otbasylary boldy. Óz elin qurmetteıtin, qadirleıtin adam tildi de tez meńgeredi. Ońtústiktiń, onyń ishinde qazaqılyqtyń ıisi ańqyp turǵan Shymkenttiń topyraǵy men aýasy jáne osy eldiń týmasy bolǵandyqtan da tildi meńgerip alýyma áser etken bolar. Qazirgi kezde qazaq tilin meńgergenime qatty qýanamyn. Meniń tilim de, dinim de, janym da taza qazaq. Men óz elimde erkin ómir súrip jatqanym úshin Qazaqstan halqyna, otbasymda meni sheksiz jaqsy kórip bar meıirimimen tárbıelegen ata-anama, meni qoldap árkez qasymda júrgen dostaryma, qarýlastaryma jáne quqyqtyq tártip áskeri – Ulttyq ulanǵa úlken alǵysymdy aıtamyn. Kóktemniń alǵashqy shýaǵymen birge kelgen Alǵys aıtý kúni merekesi qutty bolsyn! Jaqyndarymyzǵa jaqsylyq jasap, bir-birimizge alǵys aıtyp júreıik, - dedi qatardaǵy jaýynger Banadr Isaev.
Aıta keteıik, Banadr áskerge deıin bala kúninde Kavkaz halqynyń bıine degen qushtarlyǵy oıanyp, 6 jasynan bastap lezgınka bıimen aınalysqan. Bıdiń qyr-syryn jetik meńgergen Banadr 17 jasynda Astana qalasynda óziniń jeke bı zalyn ashyp, osy bı túrinen dáris bergen. Sondaı-aq, 18 jasynda «Tiktok» áleýmettik jelisinde óziniń lezgınka bıimen tanymal boldy.