«Elim-aı» kooperatıvi azamattardyń 1,3 mlrd teńgesin qaltaǵa basqan
Buǵan deıin habarlaǵanymyzdaı, bıylǵy qańtar aıynda Almaty oblysynda kooperatıv túrindegi « Elimaı-2019» qarjy pıramıdasy anyqtaldy. Kooperatıv basshysy Erbol Qızbaev pen onyń jubaıy Jazıra Ómirbaevaǵa memleketaralyq izdeý jarııalanǵan bolatyn.
«QR Qarjylyq monıtorıng agenttiginiń Almaty oblystyq aýmaqtyq departamenti qarjy pıramıdasy basshylarynyń 2019 jyldyń qarashasynan 2021 jyldyń qarashasyna deıin elimizdiń 12 óńiriniń aýmaǵynda paıyzsyz zaım usyný arqyly jyljıtyn jáne jyljymaıtyn múlik satyp alýǵa kómek kórsetý jeleýimen 2 myń salymshynyń 1,3 mlrd teńge qarajatyn tartqanyn anyqtady.
Kooperatıv quryltaıshylarynyń ony tirkeýge jáne qarjylyq-sharýashylyq qyzmetine is júzinde eshqandaı qatysy joq. Quryltaıshylyq jáne ózge de qujattarǵa qol qoımaǵan. Tutynýshylar kooperatıvi óz qyzmetin qoldanystaǵy zańnamany buza otyryp júzege asyrǵan. Qazirdiń ózinde qarjylyq pıramıda basshylyǵyn qylmystyq jaýapkershilikke tartý týraly shaǵymmen zardap shegýshi dep tanylǵan 350-den astam azamat júgindi. Sot sanktsııasymen atalǵan kooperatıvtiń esep aıyrysý shotyndaǵy aqsha qarajaty, jyljıtyn jáne jyljymaıtyn múlikter buǵattaldy»,- dep atap ótedi agenttikten.
Vedomstvo málimetinshe, tergeý soty eki kúdiktige qatysty tutqynǵa alý túrindegi bultartaý sharasyn tańdady. Shymkent qalasynyń, Aqtóbe, Batys Qazaqstan, Qaraǵandy jáne Túrkistan oblystyq departamentter de atalǵan óńirlerdiń aýmaǵynda qarjy pıramıdasyna basshylyq etý faktisi boıynsha sotqa deıingi tergeý bastady. Prokýratýranyń úılestirýimen dálelderdi jınaý, sonymen qatar kúdiktiler shyǵarǵan aktıvterdi izdeý boıynsha tergeý amaldary júrgizilip jatyr.
«Sizderdi muqııat ári abaı bolýǵa, qysqa merzimniń ishinde joǵary tabys ákeletin kúdikti usynystardan bas tartýǵa shaqyramyz. Eger siz «Elim-aı» tutynýshylar kooperatıvi» qarjylyq pıramıdasynyń zardap shegýshisi bolsańyz, onda QMA-nyń myna telefon nómirine shuǵyl habarlasyńyz: +7(7172)708-478», - delingen vedomstvo habarlasynda.