Elge shegirtke qaptatyp alǵanymyzdy jasyrmaımyz – vıtse-premer

<p>ASTANA. KAZINFORM &ndash; Májilistiń jalpy otyrysynan keıin ótken brıfıngide BAQ ókilderi Premer-mınıstrdiń orynbasary Serik Jumanǵarınnen Qazaqstanǵa qaptaǵan shegirtkeniń astyq naryǵyna áseri qandaı bolatynyn surady.&nbsp;</p>

Onyń aıtýynsha, shegirtkeniń astyqqa tıgizer zııany ushyp kelgen sanyna emes, jumyrtqa salǵan aýmaǵyna baılanysty.

«Shegirtkege qatysty aıtsaq, byltyr biz jiberip aldyq. Ony jasyrmaımyz. Shegirtke qaptap ketti. Jalpy ushyp júrgen shegirtke qaýipti emes. Túptep kelgende qazir Eýropada, Amerıkada ushyp júrgen shegirtkemen eshkim jumys istemeıdi. Biz Qazaqstan ǵana jumys isteımiz. Nege? Óıtkeni olar ushyp-qonǵan saıyn úlken aýmaqtarǵa jumyrtqa tastaıdy. Byltyr qosymsha 1 mln gektar aýmaqqa shegirtke tarady. Onyń aldyndaǵy 1,5 mln gektardy qossaq, 2,5 mln gektar aýmaqqa taraǵan bolyp otyr», - dedi vıtse-premer.

Sondaı-aq, ol bıyl Qazaqstan shegirtkemen kúreske alǵash ret drondar paıdalanyp bastaǵanyn eske saldy.

«Bıyl bıýdjetke sanıtarııa maqsatyndaǵy 100 barlaýshy dronnyń smetasyn engizemiz. Bul atalmysh jumysty jolǵa qoıý úshin qajet», - dedi S.Jumanǵarın.