Elge qaıtarady degendi estip, lagerge úsh kún jaıaý júrip jettim – Sırııadan oralǵan áıel

ALMATY. QazAqparat - «Jýsan» gýmanıtarlyq operatsııasy Sırııa elindegi oq pen ottyń ortasynda qalǵan qandastarmyzdy, otanyna qaıtarýda. Ony elimizdiń Ulttyq qaýipsizdik komıteti men memlekettik organdary halyqaralyq áriptesterimen birlesip atqaryp jatyr. Qazir elge oralǵandardyń alǵystan basqa aıtarlary joq. Bári qaıtadan baqytty ǵumyr keshýge árkettenip jatyr.

Saltanat Sırııany jumaq sanap ketken kóptiń biri. Alaıda senimi aqtalmady. Ashtyq pen soǵystyń ortasyna túsip, ómiri sergeldeńge aınaldy. Eń soraqysy, baýyr eti balasynan aıyryldy. Endi aman qalǵan ul-qyzdaryn Qazaqstanda ósirip, otanyna adal azamat etip tárbıeleýge nıetti.

«Qyzdar kúlip, bes jyldan keıin ómirińdi qalaı elestetesiń dep suraıdy. Men tolyq em alyp, tabysty bıznes-ledı bolamyn. Jeke avtokóligim, kásibim bolady dep jaýap qaıtardym»,- deıdi Saltanat.

Sham elinde Saltanat mynany túsinipti. Óz eliń men jurtyńdy súıýiń kerek. Ózgeler de seni qurmettep syılasyn deseń, ósek-ótirikten aýlaq bolý mańyzdy. Sebebi ol jaqsylyqqa aparmaıdy.

«Meniń Sırııadaǵy bes jyl ómirim óksikpen, ókinýmen ótti. Men sharasyz kúıde qaldym. Joldasym ózin-ózi jaryp jiberdi. Úlken ulym aýyr dertke shaldyǵyp sol jaqta qaıtys boldy. Kim biledi, eger kúıeýime senip sol jaqqa barmasam ulym aman-esen janymda júrer edi ǵoı. Ony emdete almadym, aıyrylyp qaldym», - dep jylady ol.

«Jýsan» operatsııasy týraly estigen Saltanat, qalyp qalmaıyn dep lagerge úsh kún boıy toqtamaı jaıaý júrip jetken.

«Qazaqstanǵa qaıtaramyz degendi estigende qýanyshtan jyladym. Sol kóshten qalyp qoımaıyn dep lagerge barynsha asyǵyp keldim. Balalaryma: «Sál shydasańdar, elge oralamyz, qıyn kúnderimiz artta qalady. Tek shydamdylyq tanytyp, meniń aıtqanymdy isteńder», - dedim. Úsh kún jaıaý júrip keldik. Allaǵa shúkir, qazir óz elimizdemiz», - dedi Sırııadan oralǵan kelinshek.

Qazir Saltanat balalarymen birge ońaltý ortalyǵynda. Onymen arnaıy mamandar jumys istep jatyr.

«Sırııadan kelgendermen psıholog, teologtar jumys istep, qoǵamǵa daıyndap jatyr. Syrtta júrip, umytyńqyraǵan ana tilin de osy jerde úıretedi. Munda kelgenderdiń kóbi tuıyqtalyp qalǵan. Ondaǵy ómir týraly múlde aıtqylary kelmeıdi. Óıtkeni azapty kúnder keshken. Soǵysta júrip jas kelinshekter baýyr eti balasynan aıyrylǵan. Olardyń jan dúnıesin emdeý úshin barymyzdy salamyz», - deıdi psıholog Roza Aıtjanova.

Alǵashqy lekpen Otanǵa oralǵandardyń kóbisi jumysqa ornalasty. Balalaryna qujat alyp, balabaqshaǵa berip jatyr. Aıta ketý kerek, «Jýsan» operatsııasy sharapaty mol sharaǵa aınaldy.