Elge 4 mln qoraptan astam temeki kontrabandalyq jolmen kirgizilmek bolǵan
«Almaty qalasy boıynsha Memlekettik kirister departamentiniń qyzmetkerleri kedendik tekserý júrgizý kezinde «sáıkestendirý quraldarymen tańbalaýsyz temekini» zańsyz alyp ótýge baılanysty keden zańnamasyn buzýdyń 3 faktisin anyqtady. Barlyq 3 faktiniń qylmystyq quqyq buzýshylyq belgileri bar.
Mysaly, «Almaty» kedendik resimdeý ortalyǵynyń qyzmetkerleri Birikken Arab Ámirliginen Qazaqstan Respýblıkasynyń aýmaǵyna ákelinetin júkti tekserý kezinde taza salmaǵy – 24,2 tonna, (1,422 mln qorap) temeki tapty. Bıýdjetke tóleýge tıisti kedendik tólemderdiń, salyqtardyń jáne aktsızdiń somasy – 403 mln teńge boldy. Materıal sotqa deıingi tergep-tekserý týraly máseleni sheshý úshin kólik prokýratýrasyna berildi.
Sondaı-aq, «Almaty» KRO qyzmetkerleri Latvııadan Qazaqstan aýmaǵyna ákelinetin, salmaǵy – 13 tonna (656 myń qorap) osyǵan uqsas júkti ustady. Bıýdjetke tóleýge tıisti somasy – 184,5 mln teńge.
«Jetisý» keden beketiniń qyzmetkerleri kedendik jete tekserý barysynda ınvoısqa sáıkes 45,6 myń oram kóleminde «dárethana qaǵazy» dep málimdelgen taýardy anyqtaǵan. Alaıda, aldyn ala tekserý barysynda «sáıkestendirý quraldarymen tańbalanbaǵan temeki ónimderi» taýary naqty anyqtaldy. Sany – 2, 090 mln qorap. Bıýdjetke tóleýge tıisti kedendik tólemderdiń, salyqtardyń jáne aktsızdiń aldyn ala eseptelgen somasy – 587,9 mln teńge», - delingen Komıtettiń baspasóz qyzmeti taratqan habarlamada.
Aıta ketsek, 2020 jylǵy qazannan bastap barlyq ımporttalǵan sıgaretter Qazaqstan aýmaǵyna ne keden qoımalaryna ákelgenge deıin sáıkestendirý quraldarymen tańbalanýǵa tıis.
Osy oraıda, Komıtet QR Keden kodeksi 34-babynyń 1-tarmaǵyna sáıkes EAEO kedendik aýmaǵyna ákelinetin taýarlar odaqtyń kedendik shekarasynan ótken sátten bastap kedendik baqylaýda bolatynyn eske salady.
Buǵan deıin habarlanǵandaı, 2023 jyldan bastap temeki ónimderine aktsız stavkalary kezeń-kezeńimen ósedi.
Foto: kgd.gov.kz