Elena Rybakına jeke rekordyna qol jetkizdi

ASTANA. QazAqparat – Qazaqstannyń birinshi, álemniń 7-raketkasy Elena Rybakına óziniń rekordtyq kórsetkishin jańartty, dep habarlaıdy QazAqparat tilshisi.

Búgin qazaqstandyq tennısshi Maıamı masters týrnıriniń ekinshi aınalymynda reseılik Anna Kalınskaıany 7:5, 4:6, 6:3 esebimen utty.

Bul – onyń qatarynan toǵyzynshy jeńisi. Osyǵan deıin ol eki ret qatarynan jeti oıynda qarsylastaryn tize búkkizgen edi.

Sonymen qatar Elena Rybakına WTA týrnırlerinde vınner sany jóninen birinshi orynǵa shyqty. Onyń esebinde 253 vınner bar.

Eıs sany (155) boıynsha Elena álem tennısshileri arasynda ekinshi orynda keledi.

Búgingi kezdesýden keıin qazaqstandyq sportshy óz pikirin bildirdi.

«Jeńgenime qýanyshtymyn. Matchty ekinshi sette bitirýime bolatyn edi, alaıda azdap kúsh-qýat jetispeı qaldy. Meniń qarsylasym qabyldaý kezinde eki ret sátti oınady ári ózim qosarly qate jiberdim. Sondyqtan ekinshi sette sáttilik joldas bolmady, degenmen úshinshi partııada óz jolymdy taýyp, jeńiske jettim. Mende eki-aq kún demalys boldy. Búgingi kún de uzaryp ketti. Matchty jaı aıaqtaýǵa týra keldi. Oǵan qosa munda kort, doptar – bári basqasha, sondyqtan ońaı tımeı tur. Degenmen osy úsh set maǵan úshinshi raýndta kómektesedi dep úmittenemin», - dedi E.Rybakına.

Eske sala keteıik, budan buryn qazaqstandyq tennısshiler juptyq synda Maıamı masters týrnırin jeńispen bastaǵanyn jazǵan bolatynbyz.

Elena Rybakına Maıamı masters jarysynyń úshinshi aınalymyna ótti.