Elena Rybakına jankúıerlerin Bıllı Djın Kıng kýbogynyń irikteý matchyna shaqyrdy

ASTANA. QazAqparat – Tennısshi Elena Rybakına jankúıerlerin Bıllı Djın Kıng kýbogynyń irikteý matchyna shaqyrdy, dep habarlaıdy QazAqparat tilshisi.

«Búgin Memleket basshysymen kezdesýde boldym. Árıne, tańerteń óte qobaljýly edim. Degenmen, jalpy bári de jaqsy ótti. Ózimniń aldaǵy josparlarymmen, týrnırler týraly aqparatpen bólistim. Erteń Qazaqstanda, osy astanada óner kórsetemiz. Barshańyzdy kórgenime qýanyshty bolamyn. Árıne, jaqsy óner kórsetip, jeńiske jetemin dep úmittenemin. Munan keıin de búkil komandamyzben birge jarqyn jeńisterimizben qýanta beremiz», - dedi Elena Rybakına Aqordada Prezıdenttiń qabyldaýynan keıingi brıfıngide.

Buǵan deıin Prezıdent Qasym-Jomart Toqaev Australian Open, Indıan-Ýells jáne Maıamı týrnırlerinde keremet óner kórsetken Elena Rybakınany quttyqtap, sheberligi men jeńiske degen erik-jigeri úshin rızashylyǵyn bildirgenin habarlaǵan edik.

Aıta keteıik, 14-15 sáýir kúnderi Astanada alǵash ret Bıllı Djın Kıng kýbogynyń irikteý matchy ótedi. Tennısten Qazaqstannyń áıelder quramasy Polsha komandasyna qarsy oınaıdy. Bul kezdesýdiń jeńimpazy álem chempıonatyna joldama alady.

Buǵan deıin habarlaǵanymyzdaı, Qazaqstan áıelder quramasy elordadaǵy Beeline Arena Ulttyq tennıs ortalyǵynda atalǵan matchqa daıyndyqty bastady.

Qazaqstannyń birinshi, álemniń jetinshi raketkasy Elena Rybakına osy matchqa qatysý úshin Astanaǵa ushyp keldi.