Elena Rybakına jańa jyldaǵy alǵashqy jeńisine qol jetkizdi

ASTANA. QazAqparat – Qazaqstannyń birinshi, álemniń 21-raketkasy Elena Rybakına Adelaıda WTA 500 týrnıriniń ekinshi aınalymyna shyqty, dep habarlaıdy QazAqparat tilshisi.

Qazaqstandyq tennısshi alǵashqy aınalymda álemniń 14-inshi, osy jarystyń 5-raketkasy, amerıkalyq Danıel Kollınzben kezdesti.

Birinshi partııa aıaǵyna taman breık jasaǵan amerıkalyq sportshy basym tústi – 7:5.

Ekinshi sette esesine qazaqstandyq tennısshi 4:1 esebimen alǵa ketti. Sosyn taǵy bir breıkpen támamdady – 6:2.

Úshinshi, sheshýshi partııada da E.Rybakına qarqynyn báseńdetken joq – 4:1. Taǵy bir breık – 5:1. Budan keıin qarsylasy esepti qysqartqanymen, Elena ekinshi ret matchqa dop bergende, qatelesken joq – 6:3.

Eki saǵat 21 mınýtqa sozylǵan tartysty báseke barysynda Elena 14 eıs jasap, 17 breık-poınttyń tórteýin paıdalandy. D.Kollınz 5 eıs, 2 breıkpen kózge tústi.

E.Rybakına shırek fınalǵa shyǵý úshin álemniń 69-raketkasy, ýkraınalyq Marta Kostıýkpen talasady. M.Kostıýk dúnıejúzilik reıtıngte 162-satyda turǵan aýstralııalyq Djeımı Forlısti tize búktirdi – 6:1, 3:6, 6:4.

Júlde qory 826 327 AQSh dollaryna baǵalanǵan týrnır 8 qańtarda márege jetedi.

Ótken jyly osy dodada E.Rybakına fınalǵa deıin jetip, onda álemniń sol kezdegi 1-raketkasy, aýstralııalyq Eshlı Bartıge jol bergen edi.

E.Bartı 2022 jyly sporttyq mansabyn aıaqtaǵandyqtan, bıyl jańa chempıon anyqtalady.

Eske sala keteıik, budan buryn Elena Rybakınanyń Adelaıda týrnırindegi qarsylasy anyqtalǵanyn jazǵan bolatynbyz.

Sondaı-aq qazaqstandyq tennısshilerdiń álemdik reıtıngidegi orny belgili boldy.

Foto: ktf.kz