Elena Rybakına Ýımbldondaǵy alǵashqy qarsylasy týraly: Ol – myqty oıynshy

ASTANA. QazAqparat – Ótken jylǵy Ýımbldon chempıony, álemniń 3-raketkasy Elena Rybakına bıylǵy jarystaǵy alǵashqy qarsylasy týraly oıymen bólisti, dep habarlaıdy QazAqparat tilshisi.

Qazaqstandyq tennısshiniń alǵashqy aınalymdaǵy álemniń 49-raketkasy, amerıkalyq Shelbı Rodjerspen kezdesýi 4 shildege belgilengen.

«Biz Shelbı ekeýimiz birneshe ret oınadyq. Sonyń ishinde eki ret kógaldaǵy tósenishte kezdestik-aý deımin. Ol – myqty oıynshy, dopty qatty beredi. Sondyqtan maǵan ońaıǵa túspeıdi. Biz bir-birimizdi jaqsy bilemiz. Qolymnan kelgenshe bárin jasaýǵa tyrysamyn. Alǵashqy matchta ortalyq kortta óner kórsetý – úlken jaýapkershilik. Oǵan qosa týrnırge chempıon retinde kelýdiń ózi múlde bólek nárse. Jarystarǵa osylaı kele beremin dep úmittenemin. Maqsat bireý – jeńimpaz bolý. Ortalyq úlken kortta ahýal árqashan erekshe. Qanaǵat alyp, oınap, jeńemin dep oılaımyn», - dedi Rybakına Londondaǵy baspasóz máslıhatynda.

Shelbı Rodjers pen Elena Rybakına ózara bes ret kezdesip, úsheýinde qazaqstandyq tennısshi basym túsken. Amerıkalyq sportshy 2020 jyly hard tósenishinde US Open dodasynda, 2022 jyly Hertogenbosta kógalda utqan. Al Rybakına 2021 jyly kógalda Berlın men Ýımbldonda, sondaı-aq 2022 jyly hardta Adelaıdada Rodjersti jeńdi.

Qazaqstandyq tennısshi, sonymen qatar daıyndyq máselesine de toqtalyp ótti.

«Ázirlik bizde jaqsy boldy, biraq tolyq daıyndalyp úlgergen joqpyz. Óz múmkindigimizge qaraı barlyǵyn jasadyq. Bul Rolan Garrostan keıin ońaı bolǵan joq. Sebebi syrqatyma baılanysty ýaqyt kerek boldy – bir apta boıy eshteńe istegen joqpyn, tek sodan keıin jaılap bastadym», dedi E.Rybakına.

Qazirgi kezde tennıs mamandary Elenany Ýımbldondaǵy chempıondyqtan basty úmitkerlerdiń qataryna qosyp otyr.

Eske sala keteıik, budan buryn qazaqstandyq tennısshilerdiń Ýımbldon týrnırindegi qarsylasy anyqtalǵanyn jazǵan bolatynbyz.

Ýımbldon aldynda qazaqstandyq tennısshilerdiń reıtıngidegi orny jarııalandy.