Elena Rybakına Rolan Garros týrnırinde 16 jastaǵy tennısshimen oınaıdy

ASTANA. QazAqparat – Qazaqstannyń birinshi, álemniń 4-raketkasy Elena Rybakınanyń Rolan Garros týrnırindegi alǵashqy qarsylasy anyqtaldy, dep habarlaıdy QazAqparat tilshisi.

Frantsııa ashyq chempıonatynda qazaqstandyq tennısshi bastapqy kezdesýin dúnıejúzilik reıtıngte 146-orynda turǵan 16 jastaǵy chehııalyq Brenda Frýhvırtovamen ótkizedi.

B.Frýhvırtova – negizgi týrnırge irikteý saıystarynan keıin joldama alǵan tennısshiniń biri.

Qazaqstannyń ekinshi, álemniń 61-raketkasy ıÝlııa Pýtıntsevanyń reıtıngte 88-satydaǵy belgııalyq Marına Zanevskaıamen kortqa shyǵatyny jerebe tartylǵan kezde-aq belgili bolǵan-dy.

Qazaqstannyń erler arasynda birinshi, álemniń 48-raketkasy Aleksandr Býblıktiń de alǵashqy aınalymdaǵy qarsylasy anyqtaldy. Ol da irikteý saıysy jeńimpazdarynyń biri, reıtıngte 129-satydaǵy ıtalııalyq Djýlıo Zeppıerımen sheberlik baıqasady.

Іrikteý saıystarynda sátti oınap, Frantsııa ashyq chempıonatyna alǵash ret joldama alǵan 22 jastaǵy Tımofeı Skatov tájirıbeli qarsylasqa tap boldy. Ol álemniń 33-raketkasy, 32 jastaǵy bolgarııalyq Grıgor Dımıtrovpen kezdesedi.

Qazaqstandyqtardyń jekeleı syndaǵy osy tórt matchy da 28 mamyr, jeksenbi kúnge belgilengen.

Eske sala keteıik, budan buryn Jibek Qulambaevanyń Serbııadaǵy jarystyń jartylaı fınalyna shyqqanyn jazǵan bolatynbyz.

Sondaı-aq Tımofeı Skatov alǵash ret Rolan Garrostyń negizgi týrnırine joldama aldy.