Elena Rybakına Monıka Selesh pen Marııa Sharapovanyń jetistigin qaıtalady

ASTANA. QazAqparat – Qazaqstannyń birinshi raketkasy Elena Rybakına 1968 jyldan beri bir maýsymda Aýstralııa ashyq chempıonaty jáne Indıan-Ýells, Maıamı jáne Rım WTA 1000 týrnırleriniń fınalyna shyqqan úshinshi oıynshy atandy, dep habarlaıdy QazAqparat tilshisi.

Buǵan deıin mundaı tabysqa álemniń burynǵy birinshi raketkalary, amerıkalyq Monıka Selesh 1991 jáne reseılik Marııa Sharapova 2012 jyly jetken edi.

E.Rybakına búgin Rım masters týrnıriniń fınalynda álemniń 47-raketkasy, ýkraınalyq Angelına Kalınınamen oınaıdy. Ony jeńgen jaǵdaıda qazaqstandyq tennısshi álemdik reıtıngte rekordtyq nátıjege qol jetkizip, tórtinshi orynǵa kóteriledi.

Fınaldyq match Astana ýaqytymen saǵat 23.00-de bastalady.

Qarsylastar ózara bir ret kezdesken. 2022 jyly Charlston WTA 500 jarysynyń ekinshi aınalymynda A.Kalınına 6:4, 2:6, 6:4 esebimen jeńiske jetti.

E.Rybakınanyń málim etkenindeı, qos tennısshi bir-birimen jaqsy qarym-qatynasta.

Eske sala keteıik, budan buryn Anna Danılınanyń Parıj týrnıriniń fınalyna shyqqanyn jazǵan bolatynbyz.

Sondaı-aq Elena Rybakına Azııa – Tynyq muhıt aımaǵy boıynsha úzdik ókilderdiń qataryna endi.

Elena Rybakına alǵash ret Rım masters týrnıriniń fınalyna shyqty.