Elena Rybakına Maıamı masters jarysynyń úshinshi aınalymyna ótti
Masters jarysynyń 10-raketkasy bolyp tirkelgen E.Rybakına dodany ekinshi aınalymnan bastap, dúnıejúzilik reıtıngte 64-orynda turǵan reseılik Anna Kalınskaıamen sheberlik baıqasty.
Qarsylastar osyǵan deıin 2019 jyly Pleıford (Aýstralııa) fınalynda kezdesip, onda A.Kalınskaıa jeńiske jetken edi – 6:4, 6:4.
Birinshi partııada reseılik sportshy breıkpen alǵa ketti. Degenmen E.Rybakına tarazy basyn teńestire aldy – 5:5. Sosyn setti taǵy bir breıkpen bitirdi – 7:5.
Ekinshi sette qazaqstandyq tennısshi breıkpen alǵa shyqty – 3:1. Alaıda Kalınskaıa esep 2:4 bolǵan mezette qatarynan tórt geımdi aldy – 6:4.
Úshinshi, sheshýshi partııada E.Rybakına breık jasap, esepti 4:2-ge jetkizdi. Kalınskaıa da qalyspaǵanymen, Elena qaıyra breık jasady – 5:3. Sodan keıin matchqa dop bergende, óz múmkindigin jibergen joq – 6:3.
Eki saǵat 14 mınýtqa sozylǵan tartysty matchta E.Rybakına 14 eıs jasap, 13 breık-poınttyń beseýin paıdalandy. A.Kalınskaıa 1 eıs, 4 breıkpen (6 breık-poınt) kózge tústi.
Elena Rybakına úshinshi aınalymda álemniń 29-raketkasy, ıspanııalyq Paýla Badosamen kezdesedi. Ol ekinshi aınalymda úsh saǵatqa jýyq ýaqytqa sozylǵan tartysty básekede reıtıngte 114-satydaǵy germanııalyq Laýra Zıgemýndty 7:6 (7:2), 4:6, 6:2 esebimen tize búktirdi.
E.Rybakına Indıan-Ýells masters dodasynda P.Badosany 6:3, 7:5 esebimen utqan edi.
Eske sala keteıik, budan buryn tennısten Qazaqstan jasóspirimderiniń irikteý kezeńiniń jartylaı fınalyna shyqqanyn jazǵan bolatynbyz.
Sondaı-aq qazaqstandyq tennısshiler juptyq synda Maıamı masters týrnırin jeńispen bastady.