Elena Rybakına Maıamı masters týrnıriniń tórtinshi aınalymyna shyqty
Qazaqstandyq sportshy úshinshi aınalymda álemniń burynǵy 2-raketkasy, qazirgi kezde dúnıejúzilik reıtıngte 29-orynda turǵan ıspanııalyq Paýla Badosamen sheberlik baıqasty.
E.Rybakına ózi jeńimpaz atanǵan Indıan-Ýells masters jarysynda P.Badosany 6:3, 7:5 esebimen utqan edi.
Bul joly birinshi partııada qarsylastar bastapqyda qos-qostan breıkpen almasqan edi. Esep 3:3 bolǵan mezette Badosa taǵy bir breık jasap, alǵa shyqty. Sosyn setti taǵy bir breıkpen bitirdi – 6:3.
Ekinshi sette P.Badosa breıkpen alǵa ketti – 4:2. Degenmen Elena tarazy basyn teńestire aldy – 4:4. Esep 5:4 bolyp, Rybakına dop bergende, ıspanııalyq tennısshi matchbolyn paıdalana almady. Budan keıin Elena qatarynan úsh geımdi óz paıdasyna jazdy – 7:5.
Úshinshi, sheshýshi partııada esep 3:3 bolǵan mezette qazaqstandyq sportshy breık jasaı aldy. Aqyry matchty taǵy bir breıkpen túıindedi – 6:3.
Eki saǵat jarymnan astam ýaqytqa sozylǵan tartysty báseke barysynda E.Rybakına 12 eıs jasap, 15 breık-poınttyń altaýyn paıdalandy. Qarsylasy 4 eıs, 5 breıkpen (15 breık-poınt) kózge tústi.
Osylaısha, Elena qatarynan onynshy jeńisine qol jetkizdi.
E.Rybakına júlde qory 8,8 mln AQSh dollaryna baǵalanǵan masters dodasynyń shırek fınalyna shyǵý úshin álemniń 39-raketkasy, belgııalyq Elıza Mertens nemese reıtıngte 41-satydaǵy horvatııalyq Petra Martıchtiń bireýimen talasady.
Ótken jyly osy jarysta E.Rybakına úshinshi aınalymǵa deıin jetken edi.
Eske sala keteıik, budan buryn Elena Rybakınanyń Maıamı masters jarysynyń úshinshi aınalymyna ótkenin jazǵan bolatynbyz.
Sondaı-aq tennısten álem chempıonatynda Qazaqstan jasóspirimderi irikteý kezeńinde 4-orynǵa taban tiredi.