Elena Rybakına Indıan-Ýells masters týrnıriniń jartylaı fınalyna shyqty

ASTANA. QazAqparat – Qazaqstannyń birinshi, álemniń 10-raketkasy Elena Rybakına AQSh-ta ótip jatqan Indıan-Ýells WTA 1000 týrnıriniń jartylaı fınalyna shyqty, dep habarlaıdy QazAqparat tilshisi.

Qazaqstandyq tennısshi shırek fınalda álemniń 76-raketkasy, chehııalyq Karolına Mýhovamen oınady.

Qarsylastar osyǵan deıin 2019 jyly AQSh ashyq chempıonatynda kezdesip, onda chehııalyq sportshy 6:4, 6:4 esebimen basym túsken edi.

Bul joly birinshi partııada K.Mýhova breık jasap, 4:2 esebimen alǵa ketti. Biraq ol setke dop bergende, Elena tarazy basyn teńestirdi – 5:5. Sosyn taı-breıkte sátti óner kórsetti – 7:6 (7:4).

Ekinshi setti Mýhova breıkpen bastady – 2:0. Sodan keıin taǵy bir breıkpen bitirdi – 6:2.

Úshinshi, sheshýshi partııada E.Rybakına breıkpen alǵa ketti – 3:1. Esep 5:3 bolǵan mezette Elena eki matchboldy paıdalana almady. Degenmen ózi dop bergende, esesin jibergen joq – 6:4.

Eki saǵat 46 mınýtqa sozylǵan tartysty match barysynda qazaqstandyq sportshy 6 eıs jasap, 14 breık-poınttyń ekeýin óz esebine jazdy. Qarsylasy 1 eıs, 3 breıkpen (6 breık-poınt) kózge tústi.

Elena Rybakına fınalǵa shyǵý úshin álemniń 1-raketkasy, Polsha ókili Iga Shventek nemese reıtıngte 83-satydaǵy rýmynııalyq Sorana Kyrstıanyń bireýimen talasady.

Eske sala keteıik, budan buryn Elena Rybakınanyń Indıan-Ýells masters týrnıriniń shırek fınalyna ótkenin jazǵan bolatynbyz.