Elena Rybakına Indıan-Ýells masters týrnıriniń úshinshi aınalymyna shyqty
Jarysty ekinshi aınalymnan bastaǵan qazaqstandyq tennısshi 2020 jylǵy Aýstralııa ashyq chempıonatynyń jeńimpazy, qazirgi kezde reıtıngte 170-orynda turǵan amerıkalyq Sofıa Kenınmen kezdesti.
E.Rybakına tartysty básekede 7:6 (8:6), 7:6 (7:5) esebimen jeńiske jetti.
Eki saǵat 8 mınýtqa sozylǵan matchta qazaqstandyq sportshy 6 eıs jasap, 6 breık-poınttyń ekeýin óz esebine jazdy. S.Kenın eıs jasamaǵanymen, 7 breık-poınttyń ekeýin paıdalandy.
E.Rybakına kelesi aınalymda ıspanııalyqtar, álemniń 22-raketkasy Paýla Badosa nemese reıtıngte 88-satydaǵy Nýrııa Parrızas-Dıastyń bireýimen sheberlik baıqasady.
Júlde qory 8,8 mln AQSh dollaryna baǵalanǵan Indıan-Ýells WTA 1000 dodasy 19 naýryzǵa deıin jalǵasady. Onda ótken jyly álemniń 1-raketkasy, Polsha ókili Iga Shventek chempıon atanǵan edi.
Eske sala keteıik, budan buryn 14 jasar qazaqstandyq tennısshiniń Úndistanda ótken jarystyń absolıýtti chempıony atanǵanyn jazǵan bolatynbyz.