Elena Rybakına Indıan-Ýells masters týrnırinde álemniń birinshi raketkasymen kezdesedi

ASTANA. QazAqparat – Qazaqstannyń birinshi, álemniń 10-raketkasy Elena Rybakına AQSh-ta ótip jatqan Indıan-Ýells WTA 1000 týrnıriniń jartylaı fınalynda álemniń 1-raketkasy, Polsha ókili Iga Shventekpen kezdesedi, dep habarlaıdy QazAqparat tilshisi.

Shırek fınalda chehııalyq Karolına Mýhovany 7:6 (7:4), 2:6, 6:4 esebimen utqan qazaqstandyq tennısshi óz sporttyq jolynda alǵash ret osy iri jarystyń jartylaı fınalyna shyqty.

«Match óte qıyn boldy. Oıyn men úshin sátsiz bastaldy. Ádettegiden jaı qımyldadym. Karolına myqty oınady, degenmen mańyzdy tustarda men sheberligimdi tanyta bildim. Alda Igamen jartylaı fınal. Aýyr match bolatyny sózsiz, degenmen men ómirge naqty qaraımyn, eger úzdik oıyn kórsetsem, jeńýge múmkindik bar», - dedi Elena Rybakına.

Iga Shventekpen match 18 naýryz kúni Astana ýaqytymen saǵat 7.00-de bastalady. Jeke kezdesýlerde Qazaqstannyń birinshi raketkasy 2:1 esebimen alda keledi. Eki aı buryn Aýstralııa ashyq chempıonatynda Elena tórtinshi aınalymda Igany 6:4, 6:4 esebimen utqan edi.

Júlde qory 8,8 mln AQSh dollaryna baǵalanǵan Indıan-Ýells jarysy 19 naýryzda máresine jetedi. Aıta ketsek, ótken jyly bul jarysta Iga Shventek chempıon atanǵan bolatyn.

Eske sala keteıik, budan buryn Elena Rybakınanyń Indıan-Ýells masters týrnıriniń jartylaı fınalyna shyqqanyn jazǵan edik.