Elena Rybakına Berlın týrnırin jeńispen bastady
Jarystyń ekinshi raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngte 139-orynda turǵan, irikteý saıysy jeńimpazdarynyń biri, reseılik, 20 jastaǵy Polına Kýdermetovamen kezdesti.
Birinshi partııada esep 5:4 bolǵan mezette Elena breık jasaı bildi – 6:4.
Ekinshi sette Rybakına 3:0 esebimen alǵa ketti. Aqyry matchty taǵy bir breıkpen túıindedi – 6:2.
Bir saǵattan astam ýaqytqa sozylǵan matchta E.Rybakına 9 eıs jasap, 11 breık-poınttyń úsheýin paıdalandy. Polına Kýdermetova 9 eıspen kózge tústi.
Bir aıta ketetin jaıt, Polınanyń apasy, álemniń 13-raketkasy Veronıka Kýdermetova da Berlınde baq synaýda.
E.Rybakına shırek fınalǵa shyǵý úshin álemniń 23-raketkasy, horvatııalyq Donna Vekıchpen talasady. D.Vekıch bastapqy kezdesýinde reıtıngte 43-satydaǵy reseılik Varvara Grachevany utty – 6:3, 6:2.
Eske sala keteıik, budan buryn qazaqstandyq jas tennısshilerdiń halyqaralyq týrnırlerde tabysty óner kórsetkenin jazǵan bolatynbyz.