Elena Rybakına alǵash ret Rım masters týrnıriniń fınalyna shyqty

ASTANA. QazAqparat – Qazaqstannyń birinshi, álemniń 6-raketkasy Elena Rybakına Rım WTA 1000 týrnıriniń fınalyna shyqty, dep habarlaıdy QazAqparat tilshisi.

Qazaqstandyq tennısshi jartylaı fınalda álemniń 20-raketkasy, 2017 jylǵy Rolan Garros jarysynyń chempıony, latvııalyq Elena Ostapenkomen sheberlik baıqasty.

Osyǵan deıin qarsylastar ózara úsh ret kezdesip, sonyń ekeýinde latvııalyq, bireýinde qazaqstandyq tennısshi jeńiske jetken edi.

Bul joly E.Rybakına oıyndy breıkpen bastady – 2:0. Taǵy bir breık – 4:1. Sodan keıin ózi dop bergen tartysty geımde tórtinshi setbolyn paıdalana aldy – 6:2.

Esesine ekinshi partııada latvııalyq tennısshi alǵa ketti – 2:0. Jańbyr jaýyp ketýine baılanysty esep 4:2 bolǵanda, básekede úzilis boldy. Úzilisten keıin E.Rybakına tarazy basyn teńestirip qana qoımaı, ózi alǵa ketti – 5:4. Sosyn ekinshi matchbolyn qur jibergen joq – 6:4.

Bir saǵat 43 mınýtqa sozylǵan báseke barysynda E.Rybakına 6 eıs jasap, 9 breık-poınttyń tórteýin óz esebine jazdy. E.Ostapenko 7 eıs, 1 breıkpen (4 breık-poınt) kózge tústi.

Osylaısha, qazaqstandyq tennısshi óz sporttyq jolynda alǵash ret Rım masters jarysynyń fınalyna shyqty.

E.Rybakına fınalda álemniń 47-raketkasy, ýkraınalyq Angelına Kalınınamen bas júldeni sarapqa salady. Ol jartylaı fınalda álemniń 12-raketkasy, reseılik Veronıka Kýdermetovany joldan taıdyrdy – 7:5, 5:7, 6:2.

Eske sala keteıik, budan buryn Anna Danılınanyń Parıj týrnıriniń fınalyna shyqqanyn jazǵan bolatynbyz.

Sondaı-aq Elena Rybakına Azııa – Tynyq muhıt aımaǵy boıynsha úzdik ókilderdiń qataryna endi.