Elena Rybakına álemdik reıtıngide rekordty orynǵa kóterildi

ASTANA. QazAqparat – Qazaqstandyq tennısshi Elena Rybakına Indıan-Ýells (AQSh) týrnırinde jeńiske jetkennen keıin WTA reıtınginde 7-orynǵa kóterildi, dep habarlaıdy QazAqparat Sports.kz-ke silteme jasap.

Týrnırge deıin Rybakına reıtınginiń 10-ornynda bolǵan edi. Jeńisinen keıin úsh pozıtsııaǵa joǵary kóterildi.

7-oryn – 23 jastaǵy qazaqstandyq tennısshiniń kásibı mansabyndaǵy eń úzdik nátıje. Onyń enshisinde 3720 upaı bar.

WTA reıtınginiń kóshbasshysy – polshalyq tennısshi Iga Shventek (9975 upaı). Odan keıingi pozıtsııada Arına Sobolenko (6740 upaı), Djessıka Pegýla (5605 upaı), Karolın Garsııa (4990 upaı), Ons Jaber (4976 upaı) jáne Korı Gaýff (4401 upaı) tur.

Aıta keteıik, bul tıtýl E.Rybakınanyń 2023 jyldaǵy alǵashqy júldesi.

Buǵan deıin habarlaǵanymyzdaı, Belarý ókili Arına Sobolenkony jeńgen Rybakına WTA-1000 Indıan-Ýells týrnıriniń jeńimpazy boldy.

Qazaqstandyq tennısshi osy jarystaǵy jeńisi arqasynda 1 mln 262,220 myń dollar tabys tapty.