Elena Rybakına jyldyń qorytyndy týrnırinde álemniń 1-raketkasyn jeńdi

<p>ASTANA. KAZINFORM &ndash; Er-Rııadta (Saýd Arabııasy) ótip jatqan WTA qorytyndy týrnırinde Qazaqstannyń birinshi, álemniń 5-raketkasy Elena Rybakına reıtıngide kósh basynda turǵan Belarýs ókili Arına Sobolenkony utty.</p>

Bul E.Rybakınanyń óz tobyndaǵy sońǵy matchy edi. Osyǵan deıin eki ret jeńilgen qazaqstandyq tennısshi jartylaı fınalǵa shyǵý múmkindiginen aıyrylsa da, álemniń 1-raketkasymen oıynda úzdik óner kórsete bildi.

Birinshi partııada E.Rybakına 6:4 esebimen basym tússe, ekinshisinde A.Sobolenko ese qaıyrdy – 6:3.

Úshinshi, sheshýshi sette Elena aıqyn basymdylyq tanytty – 6:1.

Bir saǵat 41 mınýtqa sozylǵan báseke barysynda Rybakına 6 eıspen birge 7 breık-poınttyń beseýin múltiksiz paıdalandy. Sobolenko 4 eıs, 3 breıkpen (7 breık-poınt) kózge tústi.

Kúlgin toptan A.Sobolenko men qytaılyq, álemniń 7-raketkasy Chjen Tsınven jartylaı fınalǵa joldama aldy. Qytaılyq tennısshi sońǵy oıynynda álemniń 4-raketkasy, ıtalııalyq Jasmın Paolınıdi qapy qaldyrdy – 6:1, 6:1.

E.Rybakına ótken jyly WTA qorytyndy týrnırine alǵash ret qatysyp, onda da grekııalyq Marııa Sakkarıdi jeńgenimen, qalǵan eki tennısshiden utylyp qalǵan edi.

A.Sobolenko bıyl sporttyq jolynda alǵash ret jyldy birinshi raketka retinde qorytyndylaıdy.

Eske sala keteıik, budan buryn Elena Rybakınanyń jyldyń qorytyndy týrnırinde ekinshi ret utylǵanyn jazǵan bolatynbyz.