Elena Rybakına WTA chempıondyq kestesinde úzdikter qatarynda keledi

<p>ASTANA. KAZINFORM &ndash; Qazaqstannyń birinshi, álemniń 4-raketkasy Elena Rybakına WTA chempıondyq kestesinde ekinshi orynda keledi.</p>

Qazaqstandyq tennısshiniń 3 583 upaıy bar.

Álemniń 1-raketkasy, Polsha ókili Iga Shventek 4 335 upaımen kósh basynda tur. Álemniń 2-raketkasy, belarýstyq Arına Sobolenko (3 278 upaı) úshinshi orynda.

Osy aptada E.Rybakına Madrıd WTA 1000 týrnıriniń jartylaı fınalyna deıin jetip, onda A.Sobolenkoǵa jol bergen edi.

Madrıd jarysynan keıin qazaqstandyq tennısshi WTA reıtıngisinde 6 673 upaımen burynǵysynsha 4-satyda qalady. Úzdik úshtikte I.Shventek, A.Sobolenko jáne amerıkalyq Korı Gaýff tur.

E.Rybakına álemde áıelder arasynda eıs jasaýdan kósh bastap keledi. Jyl basynan beri 35 resmı matchta Elena eıs sanyn 229-ǵa jetkizdi.

Aldaǵy aptada bastalatyn Rım WTA 1000 dodasynda E.Rybakına ótken jylǵy chempıondyq ataǵyn qorǵaıtyn bolady.

Eske sala keteıik, budan buryn Elena Rybakınanyń Madrıd masters týrnıriniń fınalynan tys qalǵanyn jazǵan bolatynbyz.

Madrıdte Rybakınany utqan Sobolenko fınalda Iga Shventekten jeńilis tapty.