Elena Rybakına United Cup komandalyq týrnırin jeńispen bastady

<p>ASTANA. KAZINFORM - Aýstralııanyń Sıdneı jáne Pert qalalarynda aralas komandalyq synda United Cup týrnıri ótýde.</p>

Qazaqstan quramasy S tobynda Ispanııamen oınap jatyr. 

Qazaqstannyń birinshi, álemniń 6-raketkasy Elena Rybakına bastapqy kezdesýin reıtıngide 54-satydaǵy Djessıka Býzas Maneıromen ótkizdi.

Birinshi partııada 4:0 esebimen alǵa ketken qazaqstandyq tennısshi sol basymdylyqty saqtap qaldy – 6:2.

Ekinshi sette esep 3:2 bolǵan mezette Elena breık jasaı bildi – 4:2. Sodan keıin matchqa dop bergende, óz múmkindigin jibergen joq – 6:3.

Bir saǵat 18 mınýtqa sozylǵan báseke barysynda qazaqstandyq sportshy 5 breık-poınttyń tórteýin paıdalandy. Ispanııalyq tennısshi 1 breıkpen (10 breık-poınt) kózge tústi. 

Bul bıyl bapker almastyryp, horvatııalyq maman Goran Ivanıshevıchpen birge jattyǵyp júrgen E.Rybakınanyń jańa maýsymdaǵy alǵashqy oıyny edi. Ótken jyly osy merzimde ol Brısben WTA 500 týrnırinde óner kórsetip, jeńimpaz atanǵan bolatyn. Bıyl E.Rybakına United Cup komandalyq jarysyna qatysýdy qup kórdi.

Qazaqstan quramasy sapynda kortqa birinshi bolyp shyqqan álemniń 78-raketkasy Aleksandr Shevchenko dúnıejúzilik reıtıngide 196-orynda turǵan Pablo Karreno-Býstadan oısyraı utyldy – 2:6, 1:6. Bul kezdesý 1 saǵat 4 mınýtqa sozyldy. 

Ázirge Qazaqstan – Ispanııa matchynda esep teń – 1:1.

Búgin ózgeris bolmasa, E.Rybakına men A.Shevchenko juptyq synda da el namysyn qorǵaıdy. 
United Cup dodasynda Qazaqstan ótken jyly alǵash ret baq synap kórgen edi.

Eske sala keteıik, budan buryn Elena Rybakınanyń el namysyn qorǵaý erekshe kóńil-kúı syılaıtyny týra aıtqanyn jazǵan bolatynbyz.