ShTÝTGART. KAZINFORM - Qazaqstannyń birinshi, álemniń 4-raketkasy Elena Rybakına Shtýtgart (Germanııa) WTA 500 týrnıriniń shırek fınalyna shyqty.
Jarysty ekinshi aınalymnan bastaǵan qazaqstandyq tennısshi álemniń 19-raketkasy, reseılik Veronıka Kýdermetovamen sheberlik baıqasty.
Osyǵan deıin qarsylastar ózara úsh ret kezdesip, bárinde Rybakına basym tústi.
Bul joly birinshi partııada taı-breıkte Elena ábjildik tanytty — 7:6 (7:3).
Ekinshisinde Veronıka ese qaıyrdy — 6:1.
Úshinshi, sheshýshi setti Rybakına breıkpen támamdady — 6:4.
Eki saǵat 35 mınýtqa sozylǵan tartysty matchta Rybakına 9 eıspen birge 9 breık-poınttyń tórteýin paıdalandy. Kýdermetova 5 eıs, 5 breıkpen (11 breık-poınt) kózge tústi.
Elena Rybakına jartylaı fınalǵa shyǵý úshin álemniń 9-raketkasy, Týnıs ókili Ons Jaber nemese reıtıngide 14-oryndaǵy ıtalııalyq ıAsmın Paolınıdiń qaı jeńgenimen talasady.
Eske sala keteıik, budan buryn Aısha Saırannyń Azııa tennıs reıtınginde 16 jasqa deıingiler arasynda kósh bastaǵanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).