Elena Rybakına Maıamı týrnıriniń fınalynda jeńilip qaldy

<p>MAIAMI. KAZINFORM &mdash; Qazaqstannyń birinshi, álemniń 4-raketkasy Elena Rybakına Maıamı (AQSh) WTA 1000 týrnıriniń fınalynda kort ıesine jol berdi.&nbsp;</p>

Qazaqstandyq tennısshi fınalda álemniń 53-raketkasy, amerıkalyq Danıel Kollınzben chempıondyq ataqqa talasty.

D.Kollınz 2022 jyly Aýstralııa ashyq chempıonatynyń fınalyna deıin jetip, álemdik reıtıngide 7-orynǵa deıin kóterilgen edi. 

Osyǵan deıin qarsylastar tórt ret kezdesip, sonyń úsheýinde Rybakına basym túsken bolatyn.

Biraq bul joly týǵan jeri – Florıda shtatynda oınaǵandyqtan, Kollınzdiń baryn salatyny anyq-ty.

Onyń ústine bul osyndaı iri jarystyń fınalyna alǵash ret shyǵyp otyrǵan 30 jastaǵy Danıeldiń sporttyq jolyndaǵy sońǵy múmkindikteriniń biri deýge bolady.

Óıtkeni ol bıylǵy maýsym sońynda oıynshy retinde mansabyn aıaqtaıtynyn málimdegen edi.

Kollınz Maıamıde óziniń babynda ekendigin kórsetse, sońǵy básekege deıin asa tartysty matchtardy ótkizgen Rybakınanyń áldeqaıda kóp kúsh jumsaǵany áser etpeı qoımasy belgili bolatyn. 

Birinshi partııada esep 6:5 bolǵan mezette amerıkalyq tennısshi breık jasap ketti – 7:5.

Kollınz ekinshi sette de 2:0 esebimen alǵa shyqty. 

Elena tarazy basyn teńestirgenimen, Danıel qaıta breık jasady – 5:3. Sodan keıin tórtinshi matchbolyn múlt jibergen joq – 6:3.

Eki saǵat 2 mınýtqa sozylǵan báseke barysynda Rybakına 5 eıs jasaǵanymen, 10 breık-poınttyń bireýin ǵana paıdalandy.

Esesine qarsylasy 4 eıspen birge 7 breık-poınttyń úsheýin óz esebine jazdy.

Osylaısha, Elena Rybakına ekinshi jyl qatarynan Maıamı týrnıriniń fınalynda utylyp qaldy. Ótken jyly ol chehııalyq Petra Kvıtovaǵa ese jibergen edi. 

Eske sala keteıik, budan buryn Aleksandr Nedovesovtiń Ispanııadaǵy týrnırdiń chempıony atanǵanyn jazǵan bolatynbyz.