Elena Rybakına ekinshi jyl qatarynan Maıamı týrnıriniń fınalyna shyqty

<p>MAIAMI. KAZINFORM &mdash; Qazaqstannyń birinshi, álemniń 4-raketkasy Elena Rybakına Maıamı WTA 1000 týrnıriniń fınalyna shyqty.</p>

Qazaqstandyq tennısshiniń jartylaı fınaldaǵy qarsylasy asa tájirıbeli, kezinde dúnıejúzilik reıtıngide kósh bastaǵan, qazir 32-orynda turǵan Vıktorııa Azarenko edi.

Ol óz sporttyq jolynda talaı tabysqa qol jetkizgen. Sonyń ishinde Aýstralııa ashyq chempıonatynyń eki ret, Maıamı jarysynyń úsh dúrkin jeńimpazy atanyp úlgergen. Degenmen Azarenko men Rybakına ózara úsh ret kezdesip, bárinde qazaqstandyq tennısshi basym túsken bolatyn.

Bul joly birinshi partııada esep 3:3 bolǵan mezette qazaqstandyq sportshy breık jasaı aldy. Sosyn setti óz paıdasyna túıindedi – 6:4.

Ekinshisinde Azarenko úsh breık jasap, bet qaratpady – 6:0.

Úshinshi, sheshýshi sette esep 2:2 bolǵanda, Rybakına breıkpen alǵa shyqty. Biraq matchqa dop bergende, óz múmkindigin múlt jiberdi – 5:5. Degenmen taı-breıkte óte sátti oınady – 7:6 (7:2).
Eki saǵat 33 mınýtqa sozylǵan tartysty báseke barysynda Elena 11 eıs jasap, 11 breık-poınttyń tek ekeýin paıdalandy. Vıktorııa 8 eıs, 4 breıkpen (8 breık-poınt) kózge tústi.

Elena Rybakına fınalda álemniń 16-raketkasy, reseılik Ekaterına Aleksandrova nemese reıtıngide 53-satydaǵy amerıkalyq Danıel Kollınzdiń bireýimen chempıondyq ataqty sarapqa salady. 

Ótken jyly Maıamıde E.Rybakına fınalǵa deıin jetip, taǵy bir tájirıbeli tennısshi, chehııalyq Petra Kvıtovaǵa jol bergen edi – 6:7 (14:16), 2:6. 

Eske sala keteıik, budan buryn Zarına Dııastyń eki jyldyń úzilisten keıin kortqa qaıta oralatynyn jazǵan bolatynbyz.

Sondaı-aq Aleksandr Nedovesov Ispanııadaǵy jarystyń jartylaı fınalyna ótti.