Elena Rybakına Madrıd masters týrnıriniń úshinshi aınalymyna shyqty

<p>MADRID. KAZINFORM &mdash; Qazaqstannyń birinshi, álemniń 4-raketkasy Elena Rybakına Madrıd (Ispanııa) WTA 1000 týrnıriniń úshinshi aınalymyna shyqty.</p>

Jarysty ekinshi aınalymnan bastaǵan qazaqstandyq tennısshi alǵashqy matchyn dúnıejúzilik reıtıngide 46-orynda turǵan ıtalııalyq Lıýchııa Brontsettımen ótkizdi.

Bul qos tennısshiniń ózara birinshi kezdesýi edi.

Bastapqy partııada Elena 2:0 esebimen alǵa shyqqanymen, Lıýchııa tarazy basyn teńestirdi. Degenmen Rybakına breıkpen támamdady – 6:4.

Ekinshi setti Brontsettı breıkpen bastaǵanymen, Rybakına oıyn tizginin qaıta qolǵa aldy – 4:1. Sodan keıin qatarynan úsh eıs jasap, birinshi matchbolyn sátti paıdalandy – 6:3.

Bir saǵat 16 mınýtqa sozylǵan báseke barysynda Elena 6 eıspen birge 5 breık-poınttyń tórteýin qur jibermedi. Brontsettı 2 eıs, 2 breıkpen (5 breık-poınt) kózge tústi.

Elena Rybakına tórtinshi aınalymǵa shyǵý úshin álemniń 21-raketkasy, ýkraınalyq Marta Kostıýk nemese reıtıngide 72-satydaǵy mysyrlyq Maıar Sherıftiń qaı jeńgenimen sheberlik talastyrady.

E.Rybakına ótken aptada Shtýtgart WTA 500 jarysynyń fınalynda M.Kostıýkti utyp, chempıon atanǵan bolatyn.

Ótken jyly qazaqstandyq tennısshi Madrıdte ekinshi aınalymnan asa almaǵan edi.

Eske sala keteıik, budan buryn Anna Danılınanyń Portýgalııadaǵy jarystyń jartylaı fınalyna shyqqanyn jazǵan bolatynbyz.