ASTANA. KAZINFORM — Tennıs tarıhynda eń iri kólemde tabys tapqan qazaqstandyq tennısshi Elena Rybakınanyń jetistigi Gınnestiń rekordtar kitabyna resmı tirkeldi.
Qazaqstandyq tennısshi Er-Rııadtaǵy (Saýd Arabııasy) bıylǵy WTA qorytyndy týrnırinde 5,235 mln AQSh dollaryn tapqan bolatyn.
Osyǵan deıin mundaı tabysqa eshkim jetken emes. Burynǵy rekordtar belorýssııalyq Arına Sobolenko men ıspanııalyq Karlos Alkarasqa tıesili edi. Olar bıylǵy AQSh ashyq chempıonatynda 5 mln AQSh dollarynan tapqan-dy.
Rybakınanyń Saýd Arabııasyndaǵy jyldyń qorytyndy jarysynda barlyq bes qarsylasyn jeńgeni belgili. Sońǵy fınaldyq básekede álemniń 1-raketkasy Arına Sobolenkony 6:3, 7:6 (7:0) esebimen utqan bolatyn.
Osylaısha, Elena Rybakına Gınnestiń rekordtar kitabyna ekinshi ret enip otyr. Ol ótken jyly Aýstralııa ashyq chempıonatynda reseılik Anna Blınkovamen eń uzaqqa sozylǵan taı-breıkke qatysqan edi.
Eske sala keteıik, budan buryn qazaqstandyq tennısshiniń Mysyrdaǵy týrnırde bir kúnde eki kezdesýin jeńispen aıaqtaǵanyn jazǵan edik.
Sondaı-aq qazaqstandyq tennısshi AQSh-taǵy týrnırdiń jartylaı fınalyna joldama aldy.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).