Elena Rybakına aldaǵy jyly «Úlken dýlyǵa» týrnırin jeńip alýdan úmitti

<p>ASTANA. KAZINFORM — Ýımbldon chempıony, Qazaqstannyń birinshi, álemniń 5-raketkasy Elena Rybakına aldaǵy jyly «Úlken dýlyǵa» týrnırlerin jeńip alýdan úmitti ekendigin málimdedi.</p>

The Tennis Letter saıtynan belgili bolǵandaı, qazaqstandyq tennısshi aldaǵy maqsaty «Úlken dýlyǵa» jarystarynda jeńimpaz bolý ekendigin aıtqan.

«Al meniń basty maqsatym — bir tamasha kúni álemniń birinshi raketkasy ataný. Bul aldaǵy jyly bolady dep úmittenemin», — dedi Rybakına.

Sońǵy eki maýsymda E.Rybakına álemniń birinshi raketkalaryn alty ret utqan. Ol polıak tennısshisi Iga Shventekti 2023 jyly Aýstralııa ashyq chempıonatynda, Indıan-Ýells pen Rımde WTA 1000 jáne bıyl Shtýtgartta WTA 500 dodasynda qapy qaldyrǵan edi. Sondaı-aq qazaqstandyq tennısshi Arına Sobolenkodan reıtıngide kósh bastaǵan kezinde 2023 jyly Beıjiń WTA 1000 jarysynda jáne keshe Er-Rııadta WTA qorytyndy týrnırinde aılasyn asyrdy.

Qazaqstandyq sportshyny endi horvatııalyq bapker Goran Ivanıshevıchtiń jattyqtyratyny belgili.

Qazaqstan tennıs federatsııasynan túsken málimetke qaraǵanda, E.Rybakına Astanada 16-17 qarashada Bıllı Djın Kıng kýbogynyń Ońtústik Koreıamen ótetin ulttyq quramanyń pleı-off matchyna keledi.

Eske sala keteıik, budan buryn tennısten Ońtústik Koreıamen oınaıtyn Qazaqstan áıelder quramasy anyqtalǵanyn jazǵan bolatynbyz.

Sonymen qatar, Elena Rybakına jyldyń qorytyndy týrnırinde álemniń 1-raketkasyn jeńdi.