Elena Maýl: TJM dıspetcheri – jaýapty mamandyq

QARAǴANDY. QazAqparat – TJM qyzmetkerleri tek qutqarýshylar-órt sóndirýshilerden ǵana quralmaıdy. Bul salada árbir tótenshe jaǵdaıdyń adam ólimisiz, barynsha az shyǵynsyz bolýyna septigin tıgizetin mamandar jeterlik. QazAqparat tilshisi 19 qazan Qutqarýshylar kúnine oraı TJM qyzmetkerleri týraly maqalalar serııasyn jarııalamaqshy. Búgingi keıipkerimiz – dıspetcher Elena Maýl.

TJM qyzmetkerin eske alǵanda, birden qıynshylyqqa tap bolǵan adamdardyń ómiri úshin jalynmen, apatpen kúresetin qutqarýshynyń batyl beınesi paıda bolady. Qutqarýshymen birge kez kelgen tótenshe jaǵdaıdy joıýda jáne qutqarýshylardyń oqıǵa ornyna qanshalyqty tez jetetindigi kómek týraly qońyraýlar qabyldaıtyn dıspetcherdiń sheshýshi áreketterine baılanysty.

Qaraǵandy oblysy Tótenshe jaǵdaılar departamentiniń Kúshter men quraldardy jedel basqarý ortalyǵy Órt baılanys pýnktiniń dıspetcheri, azamattyq qorǵaý starshınasy Maýl Elena Nıkolaevna shırek ǵasyrdan beri osy salada qyzmet etip keledi.

Dıspetcherlerdiń jumys kúnderi órt baılanysynyń ortalyq pýnktiniń shaǵyn bólmesinde ótedi. Bul jerde kún saıyn júzdegen qońyraýlar óńdeledi. Munda oblys boıynsha órtter, jol-kólik oqıǵalary jáne basqa da tótenshe jaǵdaılar týraly aqparat kelip túsedi. Dál osy bólmede adam ómirin saqtap qalý úshin kúndelikti kózge kórinbeıtin jumystar jasalady.

Bir qaraǵanda, dıspetcherlerdiń jumysy óte qarapaıym sııaqty. Biraq bul múlde teris pikir.

Dıspetcher qońyraýlardy qabyldap qana qoımaıdy. Ol aqparatty naqtylaıdy – ne jáne qaıda bolyp jatyr, adamdarǵa qaýip bar-joǵyn anyqtaıdy jáne alynǵan aqparatqa súıene otyryp, jiberiletin tehnıka men órt sóndirýshilerdiń sany týraly sheshim qabyldaıdy.

«Bizge ár túrli qońyraýlar túsedi. Adamdar shynymen kómekke muqtaj bolady, al keıde balalar oınap qońyraý shalýy múmkin. Bir balanyń qońyraýy esimde qaldy. Onyń jasy nebári 4-te edi, ol úıde órt bolyp jatqanyn, úıde ózimen onyń qaryndasynan basqa eshkim joq ekenin aıtty. Men odan «Saǵan munda qońyraý shalýdy kim aıtty?» dep suraǵanymda, ol ony teledıdardan, mýltfılmnen kórgenin jáne nómirdi esine saqtap qalǵanyn aıtty. Men ol jerge órt sóndirý bólimin jiberdim, qutqarýshylar aıtylǵan meken-jaıǵa kelgende shynymen de órt bolyp jatqanyn kórgen. Úıde jalǵyz qalǵan balalar otpen oınap, nátıjesinde órt shyqqan. Bul jalǵan shaqyrý bolmady, bizdiń jaýyngerlerimiz kishkentaı ul men qyzdy aman alyp qaldy», - deıdi Elena.

Elena Nıkolaevna bul salada 1995 jyldan beri jumys isteıdi. Ol bul mamandyqty kezdeısoq tańdamaǵan, onyń anasy men ápkesi de dıspetcher bolyp jumys atqarǵan. Olardyń órt sóndirý qyzmeti týraly qyzyqty áńgimelerin tyńdaǵan saıyn, Elenanyń da osy mamandyqqa degen qyzyǵýshylyǵy oıanǵan.

«Men kezekshiligimniń alǵashqy táýligin esimde jaqsy saqtap qaldym. Árıne, ýaıymdadym, meniń qolymnan kele me dep oılandym. Men óz jumysyma úlken jaýapkershilikpen qaraımyn. Barlyǵy bizder, dıspetcherler habarlamany qanshalyqty naqty, ári jyldam qabyldap, tehnıkany tótenshe jaǵdaılarǵa jiberetinimizge baılanysty, qutqarýshylardyń oqıǵa ornyna qanshalyqty tez jetýine baılanysty, múmkin osynyń arqasynda bireýdiń ómirin saqtap qalarmyz», - deıdi Elena Nıkolaevna.

Shırek ǵasyr boıy eren eńbek etken Elena Maýl sertıfıkattar jáne alǵys hattarmen qosa kóptegen marapattarǵa ıe bolǵan.