Elektrstansalar energııa men resýrstardy rásýa qylyp jatyr - Jaqsalıev

ASTANA. QazAqparat - Qazaqstandaǵy elektr óndirýshi kásiporyndarda energııany únemdeý sharalary durys júrgizilmeıdi. Tipti, osy ýaqytqa deıin atqarylǵan jańartý jumystary óz nátıjesin bergen joq. Keńes odaǵy kezeńimen salystarǵanda, Qazaqstandaǵy energııa únemdeý salasyndaǵy jaǵdaı áldeqaıda tómen bolyp tur, dep xabarlaıdy QazAqparat tilshisi.

Energetıka vıtse-mınıstri Baqytjan Jaqsalıevtiń aıtýynsha, búgingi tańda energetıkter neǵurlym kóp qýat kózderin satyp, tabysyn ulǵaıtýǵa tyrysyp jatady. Alaıda energııa tıimdiligin arttyrý salasyndaǵy memleket saıasaty xalyqty elektr energııany únemdeýge úndeıdi. Sol sebepti energııa óndirýshi kompanııalar men tutynýshalar arasynda bir-birine kereǵar kózqaras qalyptasty. Bir jaǵy qýat kózderin kóptep satýǵa tyryssa, ekinshiler ony tutynýdy barynsha azaıtýdy kózdeıdi.

«Degenmen, biz, energetıka mınıstrligi, óz nysandarymyzda energııa men resýrstardy únemdeýge basa nazar aýdarýymyz qajet. Sońǵy alty jyl boıy men túrli ınvestıtsııalyq baǵdarlamalardy baqylap kelemin. Sondyqtan árbir elektr stansany búge-shúgesine deıin bilemin. Ókinishke qaraı, búginde birde-bir stansada energııa únemdeý máselesine durys kóńil bólinbeıdi. Buǵan deıin atqarylǵan jańartý jumystary osy kórsetkishti jaqsartady degen jospar bolǵan. Alaıda respýblıkalyq mańyzy bar stansalardyń ózinde biz osy baǵytta naqty bir ózgeristerdi baıqamadyq. Bylaısha aıtqanda, energııa men resýrstar rásýa bolyp jatyr. Bul kórsetkish tym joǵary. Salystyrmaly túrde aıtar bolsaq, qazirgi jaǵdaı Keńes odaǵy kezeńinen de jaman bolyp otyr. Ol kezde energııa únemdeý máselesin qatty baqylaǵan bolar», - dedi B.Jaqsalıev búgin Astanada bastalǵan Energetıkalyq forýmda.

Vıtse-mınıstrdiń sózine qaraǵanda, energııa únemdeý men tabystyń tepe-teńdigin saqtap qalý úshin tarıfterdi kóterý kerek. Alaıda tarıfti shıkizattyń quny retteıdi.