Elektrondyq úkimetti damytý: Qazaqstan BUU reıtınginde 29-orynda
Forýmnyń plenarlyq sessııasyna Armenııa Premer-Mınıstri Nıkol Pashınıan, Belarýs Premer-Mınıstri Roman Golovchenko, Qyrǵyzstan Premer-Mınıstri Ýlýkbek Marıpov, Reseı Premer-Mınıstri Mıhaıl Mıshýstın, Ózbekstan Premer-Mınıstri Abdýlla Arıpov, EEK Alqasynyń tóraǵasy Mıhaıl Mıasnıkovıch, Kaspi.kz negizin qalaýshylardyń biri Mıhaıl Lomtadze men ERG dırektorlar keńesiniń tóraǵasy Aleksandr Mashkevıch qatysyp jatyr.
QR Premer-Mınıstri Asqar Mamın pandemııa jaǵdaıynda Qazaqstan ekonomıkasy turaqtylyqtyń joǵary deńgeıin kórsetkenin, bul edáýir dárejede memlekettik jáne jekemenshik sektorlardyń barlyq salalaryna tsıfrlyq sheshimderdiń engizilýiniń ósýimen baılanysty ekenin atap ótti.
«Aıqyn shekteýlerge qaramastan, biz tsıfrlyq ınfraqurylymnyń qoljetimdiligi men sapasyn arttyrý jumysyn jedeldettik. 2020 jyly 20 myń talshyqty-optıkalyq baılanys jelisiniń qurylysy boıynsha MJÁ jobasy aıaqtaldy. 1 000-nan astam mobıldi baılanystyń bazalyq stantsııasy ornatyldy, bul óńirlerdegi tehnologııalyq teńsizdik deńgeıin aıtarlyqtaı qysqartýǵa múmkindik berdi. Sonyń nátıjesinde Qazaqstan halqyn ınternetpen qamtý búginde 99%-dy quraıdy», — dedi A. Mamın.
Úkimet basshysy QR azamattary úshin tulǵa bıometrııasy boıynsha qashyqtan sáıkestendirý arqyly elektrondyq tsıfrlyq qoltańbany (ETsQ) qashyqtan alý múmkindigi berilgenin aıtty. Jıyntyqty qujat aınalymy, mobıldi jumys orny, kadrlyq ákimshilendirýge jáne áleýmettik tólemderge onlaın tásilder qoldaný sekildi jobalar belsendi engizilýde. Onlaın formatta qoljetimdi memlekettik qyzmetterdiń úlesi 93%-ǵa deıin jetti.
Sonyń nátıjesinde, 2020 jyly Qazaqstan elektrondyq úkimetti damytý deńgeıi boıynsha BUU reıtınginde 10 pozıtsııaǵa kóterilip, 193 eldiń arasynda 29-orynǵa ıe boldy. Bólshek saýda qurylymyndaǵy elektrondyq saýda kólemi ótken jyly 3 esege jýyq – 3,8%-dan 9,7%-ǵa deıin ósti. Halyqtyń qolma-qol aqshasyz operatsııalarynyń kólemi 2,5 esege, 14,1 trln teńgeden 35,3 trln teńgege deıin ulǵaıdy.
«Memleket basshysy Qasym-Jomart Kemeluly Toqaev bıylǵy jyldy memleketimizdi tıimdi tsıfrlandyrý jyly dep ótkizýdi tapsyrdy. Qazirdiń ózinde biz «aýqymdy derekter» qaǵıdattaryn memlekettik organdardyń jumysyna tereń ıntegratsııalaý boıynsha jumys júrgizip jatyrmyz. «Data-driven government» tujyrymdamasy sheńberinde derekterdi jınaý jáne óńdeý ázirleýden bastap, tıimdilik monıtorıng júrgizýge deıingi barlyq kezeńderde memlekettik qyzmetterdiń sapasyn arttyrýdyń faktoryna aınalady», — dedi A. Mamın.
Eske salsaq, Almatyda «Digital Almaty 2021- Jahandyq ekonomıkanyń tsıfrlyq bolashaǵy» atty halyqaralyq forým ótip jatyr. Memleket basshysy Qasym-Jomart Toqaevtyń forým qatysýshylaryna vıdeoúndeý joldady.