Elektrondyq tsıfrlyq qoltańbany endi uıaly telefon arqyly alýǵa bolady

TALDYQORǴAN.QazAqparat - Halyqtyń eń kóp suranysyna ıe elektrondyq tsıfrlyq qoltańbany (ETsQ) endi telefon qosymshasy arqyly alýǵa bolady, - dep habarlaıdy QazAqparat tilshisi.

Endi ETsQ alý úshin Halyqqa qyzmet kórsetý ortalyǵyna barýdyń qajeti joq. «Mobıldi HQO» qosymshasynda HQO operatorymen beıneqońyraý arqyly baılanysyp, ETsQ-ǵa úıden shyqpaı-aq tapsyrys berýge bolady.

Buǵan deıin kompıýteri joq qazaqstandyqtarǵa ETsQ alý úshin Halyqqa qyzmet kórsetý ortalyǵyna barýǵa týra keldi. Halyqtyń ótinishine qulaq asyp, Memlekettik korporatsııa jeke jáne zańdy tulǵalar úshin «Mobıldi HQO» qosymshasynda ETsQ alý múmkindigin engizdi. Ol úshin qosymshaǵa kirip «beıne qyzmeti» batyrmasyn basý kerek. Operatordyń qosylýyn kútińiz. Ol jeke kýálik pen SMS arqyly kelgen kodty surap, ótinimdi qabyldaıdy.«Jyl basynan beri 4 mıllıonnan astam azamat qyzmet alý úshin HQO-ǵa júgindi. Olardyń shamamen 30%-y erekshe suranysqa ıe ETsQ alý qyzmetine tapsyrys bergen. Sondyqtan biz HQO-ǵa barýdy qajet etpeıtin memlekettik qyzmet kórsetýdiń qoljetimdi jáne yńǵaıly amalyn oılastyrýdy maqsat ettik. Qazirgi tańda «Mobıldi HQO» arqyly 38 qyzmet alýǵa bolady. Tizimdi áli de tolyqtyramyz», - deıdi Memlekettik korporatsııanyń Basqarma Tóraǵasy Súıenish Ábdildın.
Sondaı-aq, atalǵan qosymshada jyljymaıtyn múlikke quqyq belgileıtin qujattyń telnusqasyn jáne jyljymaıtyn múlik obektileriniń tehnıkalyq pasportynyń telnusqasyn berý, balanyń týýyna jáne bala kútimine baılanysty áleýmettik tólem taǵaıyndaý, jerleýge arnalǵan bir rettik tólemderdi taǵaıyndaý, kóp balaly otbasyna járdemaqy taǵaıyndaý, turǵyn úı kómegin taǵaıyndaý sekildi eń kóp suralatyn qyzmetter de bar. Qandas mártebesin berý nemese uzartý qyzmetterin de alýǵa bolady.
Aqyly qyzmetterge tapsyrys berý kezinde tólem shoty ekinshi deńgeıdegi bankterdiń qosymshalaryna keledi. Klıent beıneqońyraý arqyly qyzmet alý barysynda baj salyǵyn birden tóleı alady. Sonymen qatar, qosymsha arqyly HQO-ǵa barýdy aldyn-ala brondaýǵa, elektrondy kezek talonyn alýǵa, sizge jaqyn ornalasqan HQO mekenjaıyn jáne ózekti máselelerdi kórýge bolady. Biz qosymshadaǵy qoljetimdi qyzmetter tizimin keńeıtý HQO-ǵa kelýshiler aǵynyn azaıtýǵa múmkindik beredi dep senemiz.
Aıta keteıik, búgingi kúnge deıin 68 myńǵa jýyq qoldanýshy uıaly telefondaryna «Mobıldi HQO» ornatqan. Qosymshany Google Play jáne App Store onlaın-dúkenderden júktep alýǵa bolady.