«Elektrondy úkimettiń» mobıldik qosymshasy shyqty
Atalmysh joba qazaq jáne orys tilderinde iOS pen Android baǵdarlamasyna negizdelgen uıaly telefondarǵa arnalǵan.
«Ulttyq aqparattyq tehnologııalar» AQ basqarma tóraǵasy Rýslan Eńsebaevtyń atap ótkenindeı, osy ýaqyttan bastap qazaqstandyqtar uıaly telefon nemese túrli gadjetterdiń kómegimen «elektrondy úkimet» usynǵan memlekettik qyzmetterdi erkin qoldana almaq.
Atap aıtqanda, elektrondyq-sandyq qoltańbasy bar árbir azamat úıde nemese shetelde júrip-aq meken-jaı týraly anyqtamany suratyp, salyq pen memlekettik qyzmetterdi, sondaı-aq aıyppuldardy tóleýge erkin qol jetkizbek. Telefon arqyly balabaqshaǵa kezekke turyp, kezektiń barysy týraly bilip otyrady.
«Munda árbir qazaqstandyq óz bıznesin, zańdy tulǵany tirkeı alady. Bunyń aldynda azamattar atalmysh qyzmetti alý úshin 5-ten astam qujat jınap, memlekettik organdardyń tabaldyryǵyn tozdyryp, 30 kúnge jýyq ýaqyt jumsaıtyn. Qazir bul úderisti úıde otyryp, bir kún emes, tipti birneshe saǵattyń ishinde, eshbir qujat tapsyrmaı-aq atqaryp shyǵýǵa bolady. Bar keregi - elektrondyq-sandyq qoltańbanyń bolýy», - deıdi «UAT» tóraǵasy.
Onyń aıtýynsha, bıyldyń ózinde onlaın tásilmen 3 myńǵa tarta zańdy tulǵa tirkelgen.
«Bizdiń saıtymyzda 22 áleýmettik mańyzǵa ıe memlekettik qyzmet túrleri kórsetiledi. Aǵymdaǵy jyldyń sońyna deıin biz áleýmettik mańyzy bar qyzmetterdi avtomattandyrýdy 100 paıyzǵa jetkizbekpiz», - dep atap ótti R.Eńsebaev.