Elektrondy úkimetimiz bar, al Qyzyl kitapty tsıfrlandyra almaı otyrmyz – depýtat

NUR-SULTAN. QazAqparat – Májilis depýtaty Elnur Beısenbaev Qyzyl kitaptyń halyqqa qoljetimdi bolmaı otyrǵanyn, saldarynan sırek kezdesetin ósimdikter men aǵashtardyń joıylyp jatqanyn synǵa aldy, dep habarlaıdy QazAqparat tilshisi.

Májilis otyrysynda depýtat Ekologııa, geologııa jáne tabıǵı resýrstar mınıstri Serikqalı Brekeshevke saýal qoıdy.

«Búginde ósimdikterdiń sırek kezdesetin jáne joıylyp ketý qaýpi tóngen túrlerin zańsyz jınaý jáne joıý faktilerin jıi kórip júrmiz. Mysaly 2020 jyly «Sýlpak» dúkeniniń aldynda Qyzyl kitapqa engen birneshe emen aǵashynyń kesilýi, Túrkistan oblysyndaǵy Greıg qyzǵaldaq túrin zańsyz julý faktileri baıqaldy. Bul faktilerdiń eń birinshi sebebi – turǵyndardyń qandaı ósimdikterdiń Qyzyl kitapqa kirgenin ajyrata almaýynda jatyr. Munda turǵyndardyń kinási nede? Ózińiz bilesiz, elimizde túsindirme jumysy joǵary deńgeıde emes. Ekologııalyq ósimdikterdi qorǵaý mádenıetin qalyptastyrýdy balalardan bastaýymyz qajet. Al biz áli kúnge deıin Qyzyl kitapty tsıfrlandyra almaı otyrmyz. Bizdiń Úkimetimiz tsıfrlandy, biraq Qyzyl kitap áli kúnge deıin tsıfrlanbaǵan jáne qoljetimsiz. Osy máseleni mınıstrlik jaqyn arada qalaı sheshýdi josparlap otyr? Jalpy túsindirme jumystaryn jaqsy deńgeıge qashan jetkizemiz?», - dedi E. Beısenbaev.

Óz jaýabynda Ekologııa mınıstri mundaı jaǵdaılardyń rasymen de bolǵanyn, osyǵan oraı, mınıstrlik halyq arasynda ekologııalyq aǵartý, sırek kezdesetin jáne quryp ketý qaýpi tóngen ósimdikterdi qorǵaýdy nasıhattaý boıynsha keń aýqymdy jumys júrgizip jatqanyn aıtty.

«2019-2021 jyldary osyndaı 23 oqıǵa oryn alyp, jalpy shyǵyn kólemi 13 mln teńgeni qurady. 2019 jyly – 13, 2020 jyly – 7, al byltyr – 3 qylmystyq is qozǵaldy. Munda tómendeý dınamıkasy baıqalady. Ákimshilik jáne qylmystyq quqyqbuzýshylyqtar týraly kodeksterge ekologııalyq zań buzǵany úshin ákimshilik jáne qylmystyq jaýapkershilikti kúsheıtýdi kózdeıtin túzetýler engizetin zań jobalary ázirlendi. Sonyń biri búgin Parlamentte qaralyp otyr», - dedi Serikqalı Brekeshev.

Aıta keteıik, Májilis depýtattary «Ósimdikter dúnıesi týraly» zań jobasyn birinshi oqylymda maquldady.

Buǵan deıin Serikqalı Brekeshev Qazaqstanda dárilik shópter retsiz jınalyp, shetel asyp jatqanyn aıtqan edi.