Elektrondy kommertsııadan alynatyn salyq platforma ıesi arqyly ustalýy múmkin

ASTANA. QazAqparat – Ulttyq ekonomıka mınıstri Álibek Qýantyrov elektrondy platforma arqyly júrgizilip jatqan saýdadan salyq qalaı alynýy múmkin ekenin aıtty, dep habarlaıdy QazAqparat tilshisi.

«Baqylaý-kassa apparattarynyń derekteri, POS-termınaldar men bank shottary arqyly ótetin aınalymdar negizinde deklaratsııalardy aldyn ala toltyrý tetigin engizý usynylady.

Al elektrondy kommertsııadan alynatyn salyqty platforma ıesi arqyly ustap qalý usynylady. Bul tásilder ázirge talqylaý satysynda», - dedi vedomstvo basshysy.

Sondaı-aq ol 2030 jylǵa qaraı Qazaqstan ekonomıkasyndaǵy shaǵyn jáne orta kásiptiń úlesin 40% arttyrý mindeti qoıylǵanyn eske saldy.

«Qazirdiń ózinde biz bul mejege qol jetkizýge bolatynyn kórip otyrmyz», - dedi Álibek Qýantyrov.