«Elektrondy densaýlyq saqtaýdyń» estondyq úlgisinen Qazaqstan ne úırene alady

ASTANA. QazAqparat - Estonııa prezıdentiniń burynǵy keńesshisi Madıs Tıık HІ Astana ekonomıkalyq forýmynda Estonııada elektrondy densaýlyq saqtaý júıesi qalaı engizilgenin aıtyp berdi, dep habarlaıdy QazAqparat tilshisi.

«Biz qazir nege densaýlyq saqtaý salasyn elektrondy túrde basqarý júıesi týraly aıtyp otyrmyz. Men bul rette estondyq densaýlyq saqtaý salasy týraly aıtyp ótkim keledi. Bizde birden-bir saqtandyrýdyń ulttyq júıesi qalyptasqan. Biraq, densaýlyq saqtaý salasynda qyzmet kórsetetin barlyq kompanııalar jekemenshik bolyp tabylady. Osylaısha, bizde densaýlyq saqtaý - memlekettik-jekemenshiktik seriktestikke negizdelgen. Atalǵan júıe ashyq ári tıimdi bolýy tısi. Bizdiń oıymyzsha, dál osyndaı júıeniń irgesin qalaı bilgen sekildimiz», - deıdi Madıs Tıık.

Onyń aıtýynsha, Estonııa - Eýropadaǵy elektrondy densaýlyq saqtaý júıesin engizgen alǵashqy memleket bolyp tabylady.

«Biz bul beleske qalaı jetkenimiz týraly aıtaıyn. Aldymen tsıfrlandyrýdyń bastalǵanyna qaıtyp oralaıyq. Bul - jaqsy ári tıimdi qyzmetterdi kórsetýge baǵyttalǵan alǵashqy qadam. Bizde barlyq aýrýhanalarymyzda medıtsınalyq málimetterdiń bári jınaqtalǵan. Bul málimetterdiń bári jabyq. Eshkimmen bólisilmeıdi. Ekinshi kezeń - ıntegratsııa. Bul uıymdar men sektorlar arasyndaǵy baılanys. Máselen, quqyq qorǵaý organdarynan júrgizýshi kýáligin alý úshin medıtsınalyq anyqtamany aýrýhanadan alý kerek. Demek, eki organnyń ıntegratsııasynyń mańyzy zor. Biz osy jaǵyn retke keltirdik», - deıdi ol.

Madıs Tıık óz sózinde elektrondy densaýlyq saqtaý júıesiniń negizgi elementteri týraly aıtyp berdi.

«Estonııada aýrýhanalar arasynda medıtsınalyq málimetterdiń qaýipsiz túrde berilýi jolǵa qoıylǵan. Medıtsınalyq málimetter eń aldymen azamattardyń ózine tıesili. Osy rette Estonııada medıtsınalyq málimetterdi tek medıtsınalyq uıymdar ǵana bir-birimen bólise alatyny týraly sheshim qabyldandy. Sonymen birge, ulttyq basqarýshylyq retteldi. Sizder (Qazaqstan - avt.) elektrondy densaýlyq saqtaý júıesine qaraı bet alyp barasyzdar. Men sizderge jumysty elektrondy júıede basqarýdy eń birinshi orynǵa qoıýǵa keńes berer edim», - deıdi ol.

Ol óz sózinde elektrondy densaýlyq saqtaý júıesi Estonııada 2009 jyldan beri sátti jumys atqaryp jatqanyn aıtty.

«Sonymen qatar, adamdar óz densaýlyǵyna qatysty sheshim qabyldaıtyndaı jumys júrgizý kerek. Bul - biz nazarǵa alýǵa tıis shart. Elektrondy densaýlyq saqtaý júıesinde olardyń ómirine keleshekte qandaı ózgerister enetinin túsindirýimiz kerek. Bul ózgerister biz qalaımyz ba, joq pa - báribir enedi. Densaýlyq saqtaý salasy - tsıfrlandyrýdan tys jerde qalmaıdy. Densaýlyq saqtaý salasynyń barlyq mamandary bunymen betpe-bet keledi. Ekinshi jaǵynan, bul densaýlyq saqtaý salasyndaǵy bıznes-moedlderge múmkindik ashady», - dep túıdi ol.