Elektrondy agrarlyq qolhattar fermerlerge qandaı múmkindik beredi
Bul týraly Parlament Májilisinde agroónerkásiptik keshen sýbektilerin qarjylandyrý máselesine arnalǵan dóńgelek ústel otyrysynda QR Aýyl sharýashylyǵy vıtse-mınıstri Rústem Qurmanov málim etti, dep habarlaıdy QazAqparat.
«Agroónerkásiptik keshendi damytý úshin nesıelik resýrstardy tartý mańyzdy ekenin túsinikti. Kepildikter jetispeıdi, sondyqtan qazirgi kezde jańa qarjylyq tetikti engizý pysyqtalyp jatyr. Shyn máninde ol veksel, ıaǵnı bolashaq astyqqa qatysty aınalysqa shyǵarylady. Agrarlyq qolhatty jabý sharalary aýyl sharýashylyǵy ónimin jetkizýmen nemese qaryzdy tóleýmen óteledi. Halyqaralyq tájirıbede atalǵan tetik aýyl sharýshylyǵy joǵary deńgeıde damyǵan elderde belsendi qoldanylyp keledi. Bul rette Brazılııany, sonymen qatar aýyl sharýashylyǵy ónimi eksporty boıynsha kóshbasshy Ýkraınany atap ótýge bolady», - dedi R. Qurmanov.
Onyń sózine qaraǵanda, elektrondy agrarlyq qolhatty engizý týraly zań jobasy Májilis depýtattarynyń bastamasymen ázirlendi. Qazirgi kezde qujat Úkimet qorytyndysyn alý kezeńinde tur. Zań jobasy aǵymdaǵy jyly qabyldanýy múmkin.
Budan buryn habarlanǵandaı, elektrondy agrarlyq qolhattardy engizý 2021 jylǵa qaraı Qazaqstannyń aýyl sharýashylyǵy salasyna 100 mlrd teńge shamasynda qarjylaı jáne taýarlyq somany tartýǵa jaǵdaı jasaıdy.
Atalǵan qarjylyq tetik salany bıýdjetten tys qarjylandyrý kólemin arttyryp, kásipkerlerdi qosymsha qaryz alý kózderimen qamtamasyz etýge múmkindik beredi. Sonymen qatar, agrarlyq qolhattar aýyl sharýashylyǵynda kepildik massasynyń jetispeýshiligi problemasyn sheshýge baǵyttalǵan. Elektrondy agrarlyq qolhattardy engizý elektrondy astyq qolhatyn iske qosý baǵytyndaǵy ońtaıly tájirıbe negizinde atqarylady.