Elektromobılderge arnalǵan ınfraqurylymdy qurýǵa baılanysty jol kartasy bekitildi
Qazir «Jasyl Damý» AQ-nyń bastamasymen elimizdiń iri qalalary men Almaty – Astana baǵytyndaǵy kúre jolda elektr jaǵarmaı quıý stansalarynyń ınfraqurylymyn damytýǵa arnalǵan joba iske asyryldy.
Osylaısha, qazir Astanada elektromobılderdi qýattaıtyn 51 stansa, Almatyda 52, sondaı-aq Pavlodar men Aqtaý qalalarynda jáne Astana – Şýchınsk baǵytyndaǵy avtojolda bir-bir stansadan qoıylǵan.
Budan bólek elimizde jeke tulǵalar men bıznes sýbektileri ornatqan birqatar jaǵarmaı quıý stansasy jumys istep tur. Buǵan qosa Qazaqstanda jyldam qýattaıtyn stansalar da bar. Máselen, bas shahardaǵy Talan Towers záýlim kesheniniń aýmaǵynda 6 Tesla Supercharger qýattaý júıesi kólik júrgizýshilerine qoljetimdi.
QR Úkimeti elektrli kólikterge arnalǵan ınfraqurylymdy jaqsartý jónindegi sharalardy qoldap keledi. Aıtalyq, EQS-nyń jelisin odan ári qarqyndy damytý úshin Úkimet bıylǵy shildede 2029 jylǵa qaraı respýblıkanyń iri qalalarynda elektromobılderge qajetti ınfraqurylymdy qurý jónindegi jol kartasyn bekitti. Bul qujat qajetti ınfraqurylymdy jobalaý men ornatýdy, elektromobılderdi qýattaýǵa arnalǵan otandyq jabdyqtardy óndirýdi, sondaı-aq elektr jetektegi kólikterdiń qýattaý stansalaryna degen qajettiligi men olardy ornalastyratyn jerdi aıqyndaý bóliginde normatıvtik jáne tehnıkalyq talaptardy engizýdi kózdeıdi.
Sondaı-aq elektromobılder men tıisti ınfraqurylymdy paıdalanýdy damytý boıynsha túrli yntalandyrý sharalary men tetikterin engizý qarastyrylady.
Búginde elimizde JAC iEv7S jáne KIA Ev6 elektromobılderin shyǵarý isi jolǵa qoıylǵan. QR Strategııalyq josparlaý jáne reformalar agenttiginiń Ulttyq statıstıka bıýrosynyń derekteri boıynsha «SaryarqaAvtoProm» kompanııasy 2016 jyldan bastap 140 elektromobıl shyǵarǵan.
Budan basqa 2024 jyldan bastap Hyundai Trans Kazakhstan JShS Hyundai Ioniq markili elektr kóliginiń óndirisin iske qosýdy josparlap otyr.